SHILLONG, NAITUNG 18 : Ka kynhun ki kali arshaka hapoh ka lama jong ka Two Wheelers Taxi Association (TWTA) ha ka sngi Nyngkong ki la leit ban kynduh ia u Commissioner and Secretary ka Transport Department ban kyrpad ba kin ailad noh ia ki kali arshaka ba kin iaid kamai katba ka sorkar kam pat pyntreikam da ki permit thymmai.
Haba kren bad ki lad pathai khubor, u General Secretary jong ka kynhun u Khrawkupar Mawkon u la ong ba bun na kitei ki samla kynthup naduh kynthei haduh shynrang ki dei kiba imja na kaba kamai Rapido. Kumta, u la ong ba lada khang kane kan ktah shibun ia ka kamai kajih bad kan buh ruh ia ki ha ka jingma kaba khraw.
Utei u samla u la iathuh ruh ba bun na kitei ki samla ki shim da ka ram ban thied bike ne scooty kumta lada khang noh ia ka lad kamai kan pynlong ia ki ban shong khlem kam bad kan buh ruh ia ki ha ka umdum kumno shuh kin lah ban siew ia ka ram ba ki shim.
“Ka sorkar ka la dei ban pynmih da ka hukum ba shipor ban ailad iangi ban bteng kamai kum ki kali arshaka,” bynrap biang u samla Khrawkupar.
Shuh shuh u ong ruh ba ka sorkar jylla kadei ban pynkylla noh ia ka Meghalaya Taxi Aggregator Operational Rules 2020 ban ailad ia ki Association /SHG bad Cooperative ban ailad ia ki lyngba ka jingkyrshan jong ka sorkar.
U ong ruh ba ki dawa ban da don ka jaka pynieng ia ki bike kamai ha kylleng ki jaka ba kongsan ha ka nongbah ban pynsuk ia ki kali arshaka ba kamai.
