Mangaldai, Risaw 13 : Ka tnat pulit ha Darrang hynnin ka sngi Balang kala pynpaw ka jingsngew bynniaw kaba jur hadien ba uwei na ki heh pulit uba ha ka kyrdan Inspector lem bad uwei pat u pulit langrut kila shah kem noh ha ki dkhot ka tnat Directorate of Vigilance and Anti-Corruption halor ka jingshah kynnoh bamsap.
U Inspector Achyut Dutta, uba dei u Circle Inspector jong ka Kharupetia lem bad u PSO jong u, u Diganta Baruah kila shah kem noh napoh ka iingsah sorkar jong u Dutta katba ki dang pdiang ia ka pisa bam sap kaba T.10,000.
Une u heh pulit ula shim ia kane ka pisa na uwei u nong ujor, u Sohrab Ali uba dei u nongshong shnong jong ka thain kaba hap hapoh Dhula Police Station hapoh ka district.
Utei u nong ujor ula iathuh lyngba ki lad pathai khubor ba u Inspector Dutta ula dawa pisa na u T.20,000 namar ka jingiarap na ka bynta ka jingioh lait noh uwei na kiba haiing ha iajan jong u, uba la shah kem hapoh ki kyndon ka NDPS Act.
Kham hashwa une u nong ujor ula iathuh ba ula dep shwa ban siew T.5,000 kum ka jingsiew kaba nyngkong, bad ha katei ka janmiet ula siew sa T.10,000 ha ki kti u PSO jong utei u heh pulit.
Ka kynhun jong ka tnat vigilance kiba la wan poi ha katei ka jaka ha ka por kumba 5:30 jan miet kila bteng ia ka jingtrei ka jong ki ban pyndep ia baroh ki jingdonkam tad haduh ka por shiteng synia hashwa ban ialam noh ia kine ki arngut ki pulit sha Guwahati.
Nalor kata la iathuh ruh ba ha katei ka jingkhynra ka kynhun ki pulit kila ioh ruh ban kurup ia ka pisa kaba la kot bun lak tyngka na ka iingsah sorkar jong utei u heh pulit uba la shah kem noh.
Lah ruh ban kdew ba hashwa kane ka jingjia, haduh san ngut ki heh pulit kaba kynthup ia u Superintendent of Police bad u Additional Superintendent of Police ki la lah ban shah sospon noh ne shah kem noh naduh kine ki khyndiat bnai ba la dep halor ka jingshah kynnoh donkti ha kaba pyndonkam bakla ia ka iktiar ka jong ki, ka jingleh sting ia ka kam bala bynshet ha ki lane namar ka jingbym don discipline wat hapdeng jong ka kam.
