Guwahati, Naiwieng 04 :Uwei u nonghikai skul ula shah kem noh hynnin ka sngi Palei halor ka jingshah kynnoh donkti ha kaba leh beijot bad pyniap dusmon ia kawei ka khynnah kaba dang 17 snem rta kaba trei kum ka nongiarap hapoh ka iingsah jong u ha Dibrugarh district ka Assam.
Ia kane ka khynnah la lap ba kala phasi noh ia lade hapoh ka iingsah jong utei u ba la shah kynnoh donkti ha ka 31 tarik u bnai ba la dep.Ki pulit kila iathuh ba kane ka khynnah kala trei bad u mynta lah kumba 10 snem kynthih.
“Une u briew uba la shah kynnoh donkti ula don hapdeng ka jingshah set bad ka jingtohkit ka dang iaid shakhmat.Ia ka metiap jogn kane ka khynnah la phah na ka bynta ban leh ia ka post mortem.Namar ba kane ka dang dei ka khynnah, kumta ruh yn pynngat hapoh ki kyndon jong ka tnat Labour,” ong u heh pulit uba pynlong ia ka jingtohkit.
Ka tyllong khubor ka iathuh ba kane ka khynnah kala phet noh na ka iingsah jong une u nonghikai mynta lah kumba katto katne taiew.Une u nonghikai hadien la kynnoh ba ula byrthen ia kiba haiing hasem jong ka ban leh da kaba tyngeh lada kam wanphai.
Da ka jingtieng ioh ba kiba haiing hasem jong ka kin shah pynshitom kumta ruh kam banse ban wanphai pat sha Dribrugarh tad hadien ba la shem ba kala pynkut noh iala ka jong ka jingim ha u tyllai phasi tang hadien khyndiat sngi.
Na ka liang kiba haiing hasem jong kane ka khynnah kila ujor mukotduma pyrshah ia une u nonghikai da kaba kynnoh ba u dei uba donkti ha kaba pyniap ia ka khun jong ki da kaba leh ruh ha kata ka rukom ban iohi ba kadei ka jingpynkut noh iala ka jingim.
Na ka liang ki seng samla pule jong ka thain bad kiwei pat ki kynhun seng kila dawa ba dei ban pynshitom tyngeh ia une u runar uba donkti ha kane ka kam pyntriem.
