Guwahati, Naiwieng : Ki bor pahara kila ioh ban kem noh ia u dkhot ka kynhun kieng atiar ba la shah khein beain, ka Manipur Naga Peoples’ Front (MNPF), kaba la shah kynnoh donkti ha kaba pyniap ia u colonel jong ka tnat shipai Assam Rifles bad ia kiba haiing hasem ki jong u nalor ki sawngut ki bor shipai.
Ki pulit kila ong ba une u dkhot ka MNPF ia uba la tip kyrteng kum u Machukring Zamshim Shimray ia uba ju khot ruh kum u Ningkhan 20 snem rta ula shah kem noh hynnin ka sngi Saitjain hadien ka jingkhynra da ki bor pulit ka Manipur, ka kynhun ka NIA ha ryngkat ki dkhot na ka tnat Assam Rifles.
U Ningkhan u dei na ka shmong New-Cannan kaba hapoh Ukhrul district, ong u heh pulit.
Une u ehrang ba la shah kem ila phla ba ula pyniasoh bad kane ka kynhun kieng atiar ha u snem 2016 lyngba uwei u briew ba la tip kum u Robert uba dei na ka kynhun MNPF, bad ula ioh ia ka Jingpyntbit kaba lai bnai kynthih ha ki kam iakhun pyrshah, kata hapoh u army number 159 ha Thumol, Myanmar, ong ka khubor pulit.
U Machukring u bat mynta kum u self-styled corporal bad trei hapoh ka jingkhmih jong u self-styled chairman ba la tip kum u Francis uba dei na kane kajuh ka kynhun.
Nalor kata ula phla ruh ba ula donkti ha kina buntylli ki kam thombor pyrshah ia ki bor shipai ka sorkar pdeng khatam ia ki shipai Assam Rifles, kata kaba kynthup ia ka kam thombor kaba la jia ha Khongtal, Chandel kaba la jia ha ka 29 tarik Naitung 2020 kaba la wanrah ia ka jingiap jong ki laingut bad ka jingmynsaw ia ki hynriew ngut kiwei pat.
Ia une u ehrang la aiti noh sha ka NIA, Imphal team na ka bynta ban leh shuh shuh ia kaba donkam.
Ha ka 13 tarik u Naiwieng 2021, u commanding officer uba ha ka kyrdan colonel ka Assam Rifles (AR) u Vivplap Tripathi ha ryngkat kiba haiing hasem jong u nalor sawngut ki dkhot ka tnat shipai kila shah pyniap hadien ba ka kali kaba ki shong ka la ngat ha ka jingshah synreit kuli pathar ha ki lehnoh hapoh Churachanpur district ka Manipur.
Kane ka kam thombor ka la jia hajam ka shnong S Sehken kaba hap hapoh Behiang police station hajan khappid ka India bad ka Myanmar.
Kane ka kali kaba kit ia utei u colonel ka la ngat ha ka jingshah thombor hadien ba ula wanphai sha la ka jong ka ktem ha ryngkat ka kurim bad u khun ba dang hynriew snem rta napoh Behiang company post.
Ha Kane ka jingjia kumba hynriew ngut kiwei pat ki dkhot ka tnat shipai kila ngat ha ki jingmymsaw.
Artylli ki kynhun kieng atiar, ka People’s Liberation Army (PLA) bad ka Manipur Naga People’s Front (MNPF) kila shim ka jingkitkhlieh hal or Kane ka kam thombor.
Na ka liang ka sorkar Manipur ka la aiti ia kane ka case sha ka NIA.
