Guwahati, Naiwieng 03 : Ka tnat criminal investigation department (CID) ha ka sngi ba Ar ba la lah kala kem noh ia uwei u heh pulit hadien ba la lap ba u donkti ha kaba shim ia ka pisa bam sap kaba 5 lak tyngka na uwei u briew ba la tip kyrteng kum u Krishna Kamal Baruah ha ka por ba la pynlong ka jingtohkit pyrshah ia u halor ka jingkynnoh leh beijot bad pyniap ia kawei ka khynnah nongtrei iing kaba dang 13 snem rta kaba la jia ha u bnai Jylliew mynta u snem.
Une u pulit ba la shah kem ia uba la tip kyrteng kum u Utpal Bora uba dei u ophisar incharge ka Dhula police station ha katei ka por hapoh Darrang district ka Assam mynta ula shah sospon naduh ka 12 tarik u bnai Nailar ba la dep.Na ka liang u Myntri Rangbah (CM) ka jylla u Himanta Biswa Sarma ula pynpaw ka jingbym sngewhun ha kaba iadei bad ka jingtohkit hadien ka jingleit jurip sha ka iingsah jong katei ka lanot ha Proja Pathar kaba hapoh Dhekiajuli ha kaba ula hukum ban sospon ia u Bora bad ruh ia u SP ka tnat CID u Raj Mohan Ray kumjuh ia u additional SP u Rupam Phukan.
Na ka liang u SP ka tnat CID u Pranab Jyoti ula pynpaw sha ki lad pathai khubor da kaba ong ba katkum ka bank statement, ki rekod phone bad ka leit ka wan jong u la shem ba u Bora ula ioh pdiang ia shiteng na katei ka pisa na u Baruah.
U Bora ruh ula shah kem noh namar ki kam sylla kam bymman, ki kam thok bad ka jingpyrshang ban buhrieh ia ki jingshisha da ka jingthmu ban iada ia u briew ba un lait na ka jingshah pynshitom.
Katei ka khynnah ka dei kaba trei hapoh ka iingsah jong u Baruah ha Dhula kum ka nongiarap kam.La shem ia kane ka khynnah ba kala khlad noh hapoh kane ka iingsah ha ka 11 tarik u bnai Jylliew ba la dep.Na ka liang ki pulit kila pynkut ia kane ka case kum ka jingpynkut hi iala ka jingim bad kem noh ia u Baruah ha u bnai Nailur ba la dep, bad la pynngat ruh ia ki dkhot ka longiing jong u halor ki jingleh jingkam kiba pynlong ia katei ka khynnah ba kan pynkut iala ka jingim.Dei ha kaba kum kane ka por ba u Bora la kynnoh ba ula ioh pdiang ia katei ka pisa ban pynkut noh ia ka case.
Namar ka jingbym sngewhun ia kane ka jingtohkit, u CM ka Assam ha ka 12 tarik u bnai Nailar ba ladep ula hukum ia ka tnat CID ba kan pynlong ia ka jingtohkit halor kane ka jingjia.Ha ka jingtohkit kane ka tnat kala sei biang ia ka metiap jong katei ka khynnah bad pynlong ia ka post mortem kaba ar ha ryngkat ka jingiarap jong ka tnat forensic bad ki riew shemphang ka tnat ka koit ka khiah kiba la pynlong ruh ia ka DNA na ka bynta u Baruah ha kaba la shem ba ka don ka jingiadei bad ki jain phong kiba khah ha kane ka lanot.
“Katkum ki sakhi satar la pynshisha halor ka kam lehbor bad pyniap, ka jingpynduh ia ki sakhi sakhia bad ka jingthmu leh beijot ha kaba la pynngat ia u hapoh ki kyndon jong ka IPC bad POCSO Act,” ong u SP ka tnat CID.
