Guwahati, Risaw 27 : Laingut ki nongwan shangkai pyrthei (tourist) na Sweden kila shah kem noh halor ka jingpynkhein ia ki katto katne ki kyndon ain bar ri ne Foreigners’ Act da kaba leit iashim bynta ha ka jingialang pynlong jingduwai hapoh Dibrugarh district ka Assam hynnin ka sngi Balang.
Katkum u Additional Superintendent of Police (ASP) u Bitul Chetia, la ong ba na ka liang ki bor pulit kila ai la ka jong ka jingujor pyrshah ia kine ki laingut halor ka jingdon bynta ha kaba leit iashim bynta ha ka jingialang jingduwai bad jingialang halor ka suk ka sain hapoh Ghinai kaba hap hapoh Namrup police station lyngba ka visa jong ki nongwan shangkai pyrthei.
Ia kine ki tourist la wanlam hakhamt ka iingkashari bad la shem ba kila leh ia ka kam kaba beain hapoh ki kyndon jong ka Act.Kumta ruh la hukum ia u deputy commissioner bad ia ki bor pulit ka district ba kin pynkhreh na ka bynta ban pynphai pat ia ki.
Ia kane ka jingialang pynlong jingduwai ba lai sngi la khot pynlong da ka United Church Forum, kaba dei ka kynhun jong ki Balang bapher bapher bad kiba la ioh ruh ia ka jingbit na ki bor pyniaid ka district.
Shuh shuh ia kine ki tourist yn pynkynriah sha Guwahati mynta ka sngi Palei, bad hadien yn pynphai pat ia ki sha Sweden, ong u Chetia.
