Guwahati, Naiwieng 10 : Ki bor pulit kila kem noh ia ki arngut ki shikpa shikhun napoh ka sor rit Goroimari kaba hapoh Kamrup district ka Assam halor ka jingshah kynnoh donkti ha kaba pyniap ia uwei u nongkhaii uba dei na Guwahati.
Utei u nongkhaii la kynnoh ba ula shah rahbor na Guwahati ha kitei ki arngut kiba la pyniap noh ia u bad bret ia ka met iap hapoh ka wah Brahmaputra, ong ki tyllong khubor.
Ka jingpyrshang ban lute na utei u nongkhaii la ngeit ba ka dei ka daw kaba la lam sha kane ka jingjia shah rahbor.Lah ban kdew ba ki bor pulit kila lapdien ia ka phone jong une u nongkhaii na kitei ki briew kiba la shah kem noh.
Katkum ki pulit la iathuh ba ki dang lah ban don sa katto katne ngut ki briew kiba donkti ha kane ka kam pyntriem, bad mynta ki dang pynlong ka jingtohkit ban lapksai shuh shuh halor kane ka jingjia.
Haba phai sha kine ki kam pyniap, tang kawei ka jingsngewkhia kaba dang iai sah :Haduh katno ka sorbah Guwahati kalong kaba shngain? Katkum ki khubor, naduh kine ki laibnai ba la dep, ki pulit kila lapdien ia bun tylli ki metiap bym lah ban ithuh na kane ka sorbah.Ha kane ka nongbah ha kaba u Myntri Rangbah (CM) ka jylla u Himanta Biswa Sarma ula kyntu ia ki bor pulit ba kin pynduna ia ki kam pyntriem, kumta ruh kiba kum kine ki jinglapdien ia ki metiap ki bym lah ban ithuh kila wan jia.
Katkum ki jingtip bala ioh na ka sorkar Assam ha ka por ba la pynlong ia ka dorbar mangtyngka jong ka assembly, ka jingdon jong ki kam duh kam thiem, ki kam pyniap bad kiwei pat ki kam pyntriem kila khie rasong naduh kine ki hynriew snem kiba la leit noh.
Ki kam tuh kam thiem hapoh kane ka sorbah kila kiew arsut, kata na ka 13,740 tylli kiba la jia hapdeng ka snem 2011 haduh Lber 2016 kala kiew sha ka 23,311 hapdeng u bnai Iaiong 2016 haduh u Rymphang 2022.
Nalor kine ki kam tuh kam thime, ki kam rahbor, ki kam kloh pisa, ki kam pyniap bad ki kam lute ruh kila kiew arsut ha kane ka sorbah ha kaba kum kane ka por.
Kila don kumba 2,546 tylli ki jingjia shah rahbor ha Guwahati hapdeng ka snem 2011 bad 2016, hynrei hapdeng u 2016 bad 2022 kila don haduh 3,648 tylli ki jingjia kaba pyni ia ka jingkiew rasong.Kumta ha kaba kum kane ka por kila don 425 tylli ki jingjia shah pyniap bad kaba la kiew sha ka 395.
