Guwahati, Nohprah 20: Hynriew ngut ki khynnah samla shynrang kila shah kem noh halor ka jingkynnoh bynta ha kaba thmu ban leit pyniasoh bad ka kynhun kieng atiar bala khein beain ka United Liberation Front of Asom-Independent (ULFA-I).
Katkum ki khubor la ong ba kine ki khynnah ki la don ha ka lynti ban leit shapoh Myanmar na Mon district ka Nagaland. La iathuh ruh ba kine ki samla kila shah kem noh hashwa ba kin poi sha ki bynta khappud jong ka ri.
Ia kine ki samla kiba la shah kem noh la tip kyrteng kum u Anand Moran, Parmanand Bora, Jayanta Gogoi, Mon Baruah, Biplab Gogoi, bad u Jiten Gogoi. Nalor kata uwei pat u briew uba kyrteng u Biman Baruah uba don jingiadei bad katei ka kynhun kieng atiar ruh ula shah kem noh ha kaba iadei bad kane ka bynta. Ka jingtohkit mynta ka dang iaid shakhmat.
Ha u bnai Risaw mynta u snem ki bor pahara kila ioh ban kem noh ia laingut ki khynnah samla napoh Tinsukia district ka Assam halor ka jingthmu ban leit pyniasoh bad ka seng lehnoh ULFA-I. Ia kine ki laingut la kem noh da ki shipai ka Assam Rifles napoh kawei ka bus na Jagun.
Kine ki laingut la kynnoh ba kila leit sha Jagun na Sivasagar da ka jingthmu ban pyniasoh bad katei ka kynhun seng lehnoh ba la khein beain.
