Aizawl, Rymphang 24: Ki shipai Assam Rifles bad kiwei pat ki bor aiñ kila pynlong ia ki jingkhynra ha kaba kila ioh kurup ia u Drok bad ia ka pisa India kiba shongdor baroh T.3 Klur bad kem ia 6 ngut ki nongkhaii Drok kiba kynthup ia ki 4 ngut ki nong Myanmar na ka jylla Mizoram.
Ha ki artylli ki jingkhynra, la ioh kurup ia u drok Heroin, ka Beer kaba na kawei pat ka ri bad ka pisa India T.1.4 Klur bad ia kine la aiti noh ha ki pulit jongka Mizoram ba kin leh ia kaba donkam.
Ka Assam Rifles kala pynlong ia katei ka jingkhynra ha ryngkat ka jingiatreilang bad ki bor ain kiba kynthup ia ka Tnad Custom bad kiwei kiwei ha kaba kila ioh kurup ia u Drok bad ia ka pisa India bad kem ia ki 4 ngut ki briew kiba na Myanmar bad 2 ngut kiba dei ki nongshong shnong ka jylla Mizoram.
Ha ka miet jong ka sngi Balang, ka Assam Rifles bad ki pulit ka Mizoram kila ioh kurup 11.39 Kg ki Methamphetamine Tablet bad 218 gram u Heroin kiba shongdor baroh T.35.19 Klur bad kila kem ia ki 3 ngut ki nongdie drok kiba kynthup lang ia ar ngut ki longkmie na ka Champai District, Mizoram.
