Guwahati, Nohprah 20: San ngut ki khynnah samla ki la shah kem noh na Hailakandi district ka Assam namar ka jingiashim bynta ha kaba leh ia ki kam stunt kiba itriem da ki thuk thuk ha ka lynti surok national highway, ong ka khubor pulit hynnin ka sngi Nyngkong.
Na ka liang u heh pulit ula ong ba kine ki san ngut ki samla ki la leh ia kine ki kam pynher syrngiew ha ka surok national highway kaba pyniasoh ia ka Hailakandi bad ka district Karimganj.
Kine ki samla kiba la shah kem ki dei kiba la tip kyrteng kum u Amin Laskar, Abdur Rahman Laskar, Fakrul Islam Laskar, Abdul Aziz, bad u Iqbal Hussain Majumdar.
Kane ka jingleh jong kine ki samla ka la pynphai khmat ia ki bor pulit hadien ba uwei na kine ki samla ula thep ia ka video lyngba ka social media.
Kham hashwa u DGP ba kyrpang ka Assam u G.P. Singh u la maham ia ki nongniah thuk thuk kiba pyrshang ban leh ia kino kino ki kam leh stunt da ki thuk thuk ha ki surok highway.
“La kyrpad ia ki nongshong shnong ka Assam ba kin pyntip lyngba ki direct message ha kaba iadei bad kano kano ka jaka lane ki briew kiba iashim bynta khah khah ha kiba kum kine ki kam leh shlur. Ia kiba kum kine ki jingpynpaw lyngba ki rynsan social media ruh dei ban pyntip sha ki bor pulit ka Assam, ” Ong u Singh lyngba ka twitter.
Ha ka sngi Nyngkong ba la lah na ka liang u Myntri Rangbah (CM) ka Assam u Himanta Biswa Sarma u la hukum ia baroh ki DC bad ki SP ba kin pynthikna halor ka jingshngain ha ki lynti surok khnang ban pynduna ha kaba iadei bad ki jingjia tyngkhuh kali ha Assam.
