Ba shukor ia ki nong America bad Canada
Shillong, Risaw 15: Saw ngut ki nong Meghalaya napdeng ki 16 ngut ki briew, kila shah kem ha ki Pulit ka Bengaluru halor ka jingkynnoh ba ki pyniaid ia ka Business Process Outsourcing (BPO) thok, kaba shukor pisa ia ki nongshongshnong ka United States of America bad ka Canada lyngba ki kor Online.
Kat kum ka jingiathuh ki Pulit, kine ki briew ki dei shibynta jong ka kompani thok ba kyrteng ka Cybits Solution Pvt Ltd, kaba don ia ka Ophis Treikam ha HSR Layout, Bengaluru, kaba kam thok ialade ba ka ai jingshakri BPO.
La kynnoh ba kane ka kompani kala thung haduh 20-25 ngut ki nongtrei lyngba ka rynsan online bad hadien ka jingai jing hikai pyntbit, kala bthah ia ki, ba kin phone bad thok ia ki briew kiba dei na kiwei pat ki Ri.
Ki saw ngut kiba shah kem na Meghalaya ki dei kiba la tip kyrteng kum u F.Minot Kankai (32), R. Remison Bamon (30), K Phani Leybha Nangzi (27) bad F Eljiba Mary Marbaniang (23). Kiwei pat ki dei na Maharashtra, Odisha, Madhyra Pradesh,West Bengal bad Gujarat.
U Police Commissioner ka Bengaluru Seemant Kumar Singh ula ong ba kine ki briew kila kam ialade kum ki Heh ka Tnad Ain ka United States bad byrngem ia ki lanot da ki jingkynnoh ba khaii droks bad ka jingkamai pisa beain. Hadien, ki sa dawa pisa ha ka nam ban pynkut noh ia ka case.
“Kine kiba shah kynnoh kila shukor ia ki briew lyngba ka internet call. Ngi la ioh kurup haduh 41 tylli ki Computer, 25 tylli ki mobile phone, ID card, router, modems, bad kiwei ki mar na ka ophis kane ka kompani” ong u Commissioneer.
Ki Pulit ki iathuh ba kane ka kompani kala thungkam ia ki briew da kaba shu leh online bad pynbiej ia ki da ki jingkular ban pynbiang jaka sah, pynbiang ia ki kali ban leit ban wan bad ka bam ba ioh ei. Kiba bun ki ngeit bad kila wan ban trei bad kane ka kompani thok.
Ki Pulit kila register da ka suo motu case ha HSR Layout Police Station bad ka jingtohkit mynta ka dang iaid shaid shaid ban lap ia ki briew ba donkti ha lyndet kane ka kompani bad ban ioh jingkhein ruh ia ka pisa ba kila thok na ki briew ba shabar ka Ri.
 thok, kaba shukor pisa ia ki nongshongshnong ka United States of America bad ka Canada lyngba ki kor Online.){kind=link}