Guwahati, Iaiong 07: Ki bor pulit ka Morigaon ha ka sngi Thohdieng ba la lah ki la ioh ban kem noh ia sawngut ki briew bad ioh kurup haduh 386 tylli ki ATM card na ki bynta jong ka Marigaon, Assam.
Ia kine ki sawngut la tip kyrteng kum u Masud Ahmed(27), Mubarak Hussain(34), Saddam Hussain(29), bad u Taskir Ahmed(24 snem rta).
Ka kynhun pulit ba kyrpang hapoh ka jingialam u Additional superintendent of police (crime) u Samiran Baishya ki la pynlong ka jingkhynra bad ioh ban kem noh ia sawngut ki briew ha ki bynta kiba hap hapoh Mikirbheta police station ha Morigaon ha katei ka sngi Thohdieng ba la lah.
Haba kren sha ki lad pathai khubor, u Samiran Baishya ila ong, “Hadien ba ngi la ioh jingtip mardor ngi la pynlong ka jingkhynra bad ioh kem noh ia sawngut ki briew bad ioh kurup haduh 386 ki ATM card jong ka central Bank.Nalor kata ngi la ioh ruh ban kurup ia ka pisa T.40,925.”
“Ngi la ioh ruh ban kurup ia kawei ka kali Wagnor kaba don ia u registration no AS 01EY7385 kaba la pyndonkam da kitei ki sawngut. Hadien ka jingtohkit nhi la shem na ki la sei pisa da kaba pyndonkam da kine ki ATM card na ki bynta jong ka Nagaon, ” Ong u Baishya.
Shuh shuh u la ong ruh, “Ia mynta hi nhi dang shu sdang ia ka jingtohkit. Ngi dang bishar bniah nangno ki ioh ia kine ki ATM card. Ngi la sdang ia ka jingtohkit bad shen ngin sa nang lapksai shuh shuh ha kaba iadei bad kane ka jingjia baroh.
