Imphal, Naitung 08: Ki pulit ka Jylla Manipur ha ka sngi Nyngkong kila iohkem ia 3 ngut ki ehrang kiba don bynta bad ki kynhun kieng atiar ha ka jingkhynra kaba la pynlong ha kylleng ki bynta jong ka jylla Manipur.
Ha kawei ka jingkhynra la iohkem ia uwei u dkhot jongka Kangleipak Communist Party (People’s War Group) uba la khot sin u Lallouba (18 snem), na Lamphel Grace Colony ha Imphal West bad la kynnoh ba udei uba donkti ha ki kam dawa pisa.
Katba ha ka jingkhynra ha Imphal East, ki pulit kila iohkem ia u Thokchom Wilson Singh uba ju khot sin da u BK (26 snem), udei u dkhot jongka People’s Revolutionary Party of Kangleipak (PREPAK), na Bamon Kampu Mayai Leikai.
La kynnoh ba udei u nonglum ia ka pisa kaba la dawa na ki dukan bad na ki nongdie jingdie ha katei ka thain kum ha Canchipur, Mantripukhri bad Kakwa.
Na ka met jongu Thokchom la ioh ban kurup ia kawei mobile phone.
Ha kawei pat ka jingjia, ki pulit kila kem ia uwei u rangbah uba la don 43 snem ka rta uba la tip kum u Khumanthem Bikramjit Singh, na Thoubal district ha kaba la suba jur ba udei uba donkti ha kaban sam ia ki SIM Card sha ki ehrang jong ka
PREPAK (PRO).
Ki pulit kila ong, ba ia kitei ki SIM Card la pyndonkam da ki lehnoh kiba don ha
Myanmar ban dawa pisa na ki nongshong shnong ha Thoubal.
Ki pulit kila pynjur ia ka jingpynlong ia ka jingkhynra ha kylleng ki bynta jong ka Manipur bad kila iohkem ia ki katto katne ki dkhot jong ki kynhun kieng atiar.
“Kiba bun na kitei ki kynhun kieng atiar kidei kiba donkti ha ki kam dawa pisa. Ki leit rung da kaba suk sha Myanmar hadien ba kila dep leh ia ki kam pyntriem ki jongki. Ngi la phah peitngor ia baroh ki thain khappud bad la shim ia baroh ki lad ki lynti ban tehlakam ia kine ki kam be-ain” la ong uwei u heh pulit.
