Pathsala, Nohprah 27: Ha kawei pat ka jingjia kaba la pynher syrngiew ia kiba bun balang, kawei ka khynnah 17 snem rta ka la shah kawang da ka acid battery ha uwei u samla 20 snem rta ha Barpeta district ka Assam, ong ka khubor heh sorkar mynta ka sngi ba Ar.
Na ka liang ki pulit ki la ong ba kane ka khynnah ka ithuh ia une u nongthombor.
Kane ka jingjia ka la wan jia katba Kane ka lanot ka dang wanphai sha la iing na ka tamasa. Ka daw ha lyndet kane ka kam thombor la ong ka dei namar ka jingpulom ha ka jingiadei jingieit.
Utei uba la shah kynnoh donkti ula shim ia kane ka sienjam ba triem hadien ba katei ka lanot ka la shim ia ka rai ban pynkut noh ia ka jingiadei bad u.
Na ka liang ki bor pulit ki la kem noh ia une u samla hadien jong katei ka jingjia.
Katkum ki bor pulit kane ka jingjia ka la jia ha ka shnong Mazdia kaba hap hapoh Sarthebari police station ha ka sngi U Blei ba la lah.
Ha ka jingtohkit la shem ba kane ka lanot ka la pynkut noh ia ka jingiadei bad une u briew dang ha kine ki khyndiat por ba la dep. Da ka jingsngew bynniaw halor kane, une uba la shah kynnoh donkti ia uba la tip kyrteng kum u Meher Ali u la kawang ia ka da ka acid battery, ong u Pradip Saikia una dei u additional SP ka Barpeta district ka Assam.
Katkum ki khubor la ong ba kane ka khynnah ka la mynsaw jur na ki bynta u ryndang bad tyrpeng bad ka don mynta hapdeng ka jingshah sumar hapoh ka hospital ha ka thain.La pyllait noh ia kane ka khynnah ha ka sngi Nymgkong hadien ba ka la kham ioh khiah.
