Shillong, Nailar 08 : Ka Meghalaya High Court ha ka sngi Thohdieng kala shah ban pynlong ia ka jingiaid Yatra ha ka 9 tarik Nailar sha krem Mawjymbuin, Mawsynram, bad bthah ia ki bor district ka East Khasi Hills ban pynthikna ia ka jingshngain bad jingiaid beit kat kum ka Standard Operating Procedure u snem 2025.
U Justice HS Thangkhiew ula pynmih ia kane ka hukum haba bishar ia ka WP(C) No. 275 u snem 2024 hadien ba ka Iingkashari ha ka 5 tarik Nailar, kala bthah ia ki bor district ba kin pyntip la ki lah ka long ban ai jingbit ia ka Yatra.
Halor kane, u Deputy Commissioner Abhilash Baranwal ula pynlong ia ka jingialang ha ka 6 tarik Nailar bad ki Pulit lem bad ki nongtrei na Block, ia kaba ia ki mat jingiakren la wanrah hakhmat ka Iingkashari.
U Superintendent of Police ula pyntipha ka jingialang ba u lah ban pynbiang ia ka bor pahara kaba biang lada ki nongpyn iaid ki bud ia ka SOP 2025.
U BDO ka Mawsynram, ula aiti ia ka shithi na u Rangbah Shnong ba pyntip ba katba ki Nongshongshnong kila rai ban nym ailad ia kano kano ka jinglehniam hapoh ka krem, ki long pat kiba kloi ban pdiang ia baroh ki nongwankai da ka burom kam pher ki dei na kano kano ka jaidbynriew ne ka niam.
U nongiasaid ain ki nongmudui ula pynpaw ba ki pdiang ia ka nongrim iatreilang jong ka Jylla bad ka Dorbar Shnong bad kyrpad pat ban shah ia ki Yatri ba kin theh um malu mala kum ka dak ka jingburom, kumba la pynpaw ha ka hukum ba hashuwa.
Haba buh jingthoh ia ka jingiakren bad ka kaiphod ki pulit, ka Iingkashari kala ong ba kane ka Yatra ka lah ban iaid shakhmat ha ka 9 tarik Nailar.
Kala hukum ba dei ban shah ban rung shapoh ka kren na ka bynta ki nongwankai ha katei ka sngi, haba shimkhia pat ia ka jingsngewkhia ka Dorbar Shnong ban khang ia kiwei kiwei.
Ka Iingkashari kala ailad ruh ia ki dkhot ka Yatra ba kin theh um tang khyndiat lada ki kwah, hynrei kim dei ban pynlong ia kano kano ka jingleh niam hapoh ka krem.
U Advocate General ula kular ia ka Iingkashari ba ka Jylla kan pynthikna ba kane ka Yatra kan iaid beit iadi ryntih.
Ka Iingkashari kala buh ban bishar biang ia ka kam ba dang sah ha ka 1 tarik Nailur, 2026.
