Shillong Nailar 08: U Kyrtong ka NPP sha ka elekshon shiteng samoi ka Shillong Lok Sabha Dr DRL Nonglait ha ka sngi Palei, ula ai jingmut ba dei ban buh ia ka shnad treikam (Branch/ Cell) ka FCRA ha Meghalaya ban pynsuk ia ki kynhun niam ba kin register.
Haba kren ha ka rynsan ialap elekshon ha Rymbai, East Jaintia Hills district, u Dr Nonglait ula ong, ba kala don ka jingklumar jingmut jong kiba bun ha kaba iadei bad ka Foreign Contribution Regulation Act, ha kaba bun ki balang bad ki kynhun niam kila pynpaw ia ka jingsngewkhia ha kaba iadei bad ka jingwan poi jong ka pisa na ka bynta ki kam jong ka mission bad jong ki project.
“Kala don ka jingklumar jingmut ha kaba iadei bad ka mat jong ka FCRA. Bun ki iingmane bad ki kynhun niam ki bapher bapher kila dap da ka jingsngew khuslai halor kane” ong u Dr Nonglait.
Ula ong, ba ki nongialam ka jylla kila shimkhia bha halor kane ka mat.
“Nga lah dep iakren bad u Myntri Rangbah ka Jylla ryngkat bad ki arngut ki Symbud Myntri Rangbah ka Jylla bad ha kaba iadei bad ka jingsngewkhia ban shah ktah jur ki kynhun niam kiba pyntreikam ia ki Mission kiba la kyrshan da ki ri kiba nabar” ula ong.
Da kaba sot ia ka jingkren u Myntri Rangbah, u Dr Nonglait ula ong, ba ka Sorkar Pdeng kam don ia ka jingthmu ban khanglad ia ka jingnoh synniang jong ki ri kiba nabar hynrei kadei thik tang ban pynbeit ryntih ia ka rukom treikam.
“U Myntri Rangbah ula ong, ba ka Sorkar India kam don jingthmu satia ban pynsangeh ia ka jingai jingiarap kaba wan na shabar ri, hynrei kadei tang ban pyrkhing, kaba mut ban buh ryntih ia ki kyndon treikam” ula ong.
Ban shimkhia ia kane ka mat kaba la shem jingeh da ki kynhun bapher hapoh ka jylla, u Dr Nonglait ula tyrwa ba dei ban buh noh ia ka shnad treikam.
“Ban pynsuk ia kiei kiei baroh na ka bynta ki kynhun niam ki bapher bapher kiba donkam ia ka jingiarap na shabar ka ri, ia ka shnad treikam kum ka Branch ne Cell dei ban buh noh hapoh ka jylla Meghalaya khnang ba kino kino kiba donkam ban pynthymmai ia ka FCRA Registration ki lah ban leh da kaba suk khlem kino kino ki jingeh” ula ong.
Ula pynpaw ba ki hospital, skul, ki jaka ri khunswet, ki Counseling Center kiba la pyniaid da ki kynhun niam ki donkam ia ka jingiarap nabar ri bad ki mad ia ka jingeh ha kaban bud ryntih ia ki kyndon jong ka FCRA kaba na shabar ka jylla.
U Dr Nonglait ula bynrap ba ka jingdon ia ka Cell hapoh ka jylla kan iarap ia ki kynhun ba kin rejistar katkum ka por ba la buh bad ban kiar na kino kino ki jingslem ha kaban ioh pdiang ia kino kino ki jingiarap ha kaba iadei bad ki projek kiba dang iaid shakhmat.
