Shillong Nailur 15: U Bah Gloucester Nongbet na ka jylla Meghalaya, udei uwei na ki 84 ngut ki nongtem nongrwai tynrai ha ka ri India u ban ioh pdiang iaka Sangeet Natak Akademi Amrit Awards ha ka jingrakhe ia ka Azadi Ka Amrit Mahotsav.
Ia kane ka Award yn aiti da u Vice President ka ri India u Jagdeep Dhankhar.
Kine ki 84 ngut kiban ioh khusnam kidei kiba la don palat iaka 75 snem ka rta.
U bah Gloucester Nongbet yn ioh ia katei ka khusnam halor ka jingnoh synniang ka jongu ha ka tem ka put bad ka rwai tynrai ha ka jylla Meghalaya.
La kha ia u Bah Gloucester ha ka 8 tarik u Naitung 1938 ha Shillong, East Khasi Hills bad u Bah Gloucester ula sdang don bynta ha ka tem ka put bad ka rwai tynrai naduh ki rta kiba u dang khynnah bha.
Ula shongthait na ka kam kum u IRS Officer jong ka Department of Customs, jong ka sorkar Meghalaya.
U Bah Gloucester Nongbet udei uba sngewtynnad bha ban rwai ia ki jingrwai tynrai, ban thaw iaki jingrwai bad udei ruh u nongtem ba tbit bha ban tem iaka Duitara.
U dei ruh uba tbit bha ha kaban shna iaka Duitara bad u dei ruh uba tbit bha ban tem ia ki jingtem tynrai, ban put iaka bisli, Guitar bad ia ka Piano.
U bah Gloucester Nongbet ula thoh ia ki jingrwai bad pynwandur ia ka jingrwai tynrai palat 100 tylli kiba iadei bad ka mariang, jingieid ri bad kiwei kiwei.
Nakor kane udei ruh u ‘A’ grade Artist jongka All India Radio bad Doordarshan bad ula iashimbynta ha kiba bun ki lympung ban pyni iaka sap jongu ha ki rynsan kiba long hapoh ka jylla bad ha kylleng jong kane ka ri.
Ula thoh ruh bun tylli ki khana na ka bynta ka jingak drama bad phlim bad ula ak ruh ha ka phlim Khasi kaba la ai kyrteng Sha Ba Sep Ka Sngi bad kiwei kiwei.
