Nongpoh, Kyllalyngkot 31: Ka long ka jingsarong bad ka burom ym tang ia ka ïing ka sem, ka shnong ka thaw bad ka District hynrei ia ka jylla Meghalaya baroh kawei, ha kaba kawei ka samla na Ri Bhoi ka la shah jied kum ka Best Commander ha ka NCC Prime Minister Rally kaba la long ha ka 28 tarik u Kyllalyngkot ha Nongbah Delhi ba la shim bynta da u Myntri Rangbah ka ri, u Narendra Modi.
Kane ka samla kaba la ioh khur ia ka nam best Commander ha NCC Prime Minister Rally nadpeng ki 17 tylli ki kynhun (Contingent) kiba la shim bynta ha kane ka rally, ka dei ka samla Risa-iba Laloo, kaba dei ka khun jong u Bah Was Laloo bad ka Kong Wilda Teron na ka Shnong Diwon ha Ri Bhoi District.
Kane ka samla ka dei kaba leit ban mihkhmat ia ka North East Region NCC Cadet ha ka NCC Prime Minister Rally ha Delhi bad kane ka samla na Ri Bhoi, ka la shah jied ban long ka best Commander kaba la ialam ia ka parade jong ki 17 tylli ki kynhun (Contingent) ryngkat ka jingdon lang ki 4 platoon ka kynhun na ka tnad Army, Navy, Airforce, bad Army Senior Wings.
Haba la ioh ban ia kren bad ka Samla Risa-iba Laloo, ka la pynpaw ia ka jingkmen ba ka la shah jied ban long kata ka Commander ha katei ka NCC Prime Minister Rally ba la shim bynta da u Prime Minister ka Ri India kum u kongsan ryngkat ka jingdonlang ki heh sorkar na ka sorkar kmie.
Ka la pynpaw ia ka jingsngew sarong ruh ba haduh 17 tylli ki kynhun NCC (Contingent) kiba la shim bynta ha kane ka NCC Prime Minister Rally, ka la ioh ia ka lad ban command ne ialam ia kitei ki kynhun haba pynpaw ba kane ka long shisha ka jingai mynsiem ia ka kum ka samla ba kan dang lah ban don ia ka thong ha ka jingim jongka kum ka samla na ka jylla Meghalaya ban jop ia kiba bun ki jingangnud ha ka jingim jongka.
