Shillong, Rymphang 14: Ka Meghalaya Football Association kala pynpaw iaka jingkmen halor ka jingshah jied ka Bonifilia Shullai ban ioh mihhmat ia ka ri India ha ka SAFF U-16 Women’s Championship kaban long ha Lalitpur, Nepal.
Ka Bonifilia kala shah jied kum kawei napdeng ki 30 ngut ki thei ialehkai Football ban mihkhmat ia ka ri India haka jngialehkai iaka Football ha ka SAFF U16 Women’s Championship bad la lap ia ka sap ka phong bad ia ka jingtbit ialehkai jong kane ka khynnah kynthei ha ka por ba ka iashimbynta ha ka Sub Junior Girls National Championship 2023-24 bad kane ka pyni shai kdar ruh ba ka Meghalaya ka don ia ki Kynthei kiba tbit bha ban ialehkai Football.
“Ngi phah ia ka khubor ai khublei bad kitbok kitrwiang sha ka Bonifilia Shullai kaba la dei hok ban ioh ia kane ka jingithuh. Ka jingtrei shitom met bad mynsiem, ka jingdon ia ka sap ka phong bad ka jingskhem jingmit kala pynlong ia ka ban ioh jaka ha kakynhun ialehkai jong ka ri bad mynta ka dong hapdeng ka jingpyntbit hapoh ka jylla Goa naduh ba kala shah jied. Katba ki dang pynkhreh ban mihkhmat ia ka ri, ngi kitbok ia ka Bonifilia bad ia kiwei kiwei ki nongialehkai kiba mihkhmat ia ka ri ba kin ioh ia ka jingjop ha katei ka lympung iakob ialehkai” la pynpaw u President ka MFA u Bah Hamletson Dohling.
Ka Meghalaya Football Association ka sngewsarong bad ieng ryngkat bad ka Bonifilia bad ban ai ka jingkyrshan bad ban saindur iaka sap ka phong jong ki nongialehkai Football kiba donsap ha kylleng ki jaka jong ka jylla.
