Nongpoh, Jylliew 22 : U samla Ferdinald Kharkamni ula shah jied biang ha ka sien kaba san kum u President ka Khasi Students’ Union (KSU) ka North Khasi Hills na ka bynta ka samoi 2024-2027.
Ka KSU-NKH kala pynlong ia ka General Election hynne ka sngi Saitjain, ban jied nongkitkam ba thymmai jong ka District .
Ia kane ka elekshon la pynlong ha Iingdorbar Hall jong ka shnong Nongpoh ha Sajer ha ka jingiadonlang ki Nongialam ka Sengkmie ba kynthp ia u samla Raymond Kharjani, Organising Secretary bad kiwei kiwei.
Nalor u samla Ferdynald, kiwei pat ki Nongkitkam ki kynthup ia u Joseph Lambok Rymbai – Vice President, u James Hitler Mawphniang-General Secretary, Banjop Maring -Assistant Secretary, Baiashanlang Kharshanlor-Organising Secretary, Toning Lapang-Education Secretary, Richard Roy Lyngdoh Nonglait-Information and Publicity Secretary, Johny Nongrum-Sports Secretary, Jefrey Wahlang-Environment Secretary bad u John Lyngdoh-Office Secretary.
Haba ai jingkren ha ka jingialang, u samla Ferdunald Kharkamni ula ai khublei kyrpang ia baroh ki nongialam bad ki dkhot ka KSU kiba la jied ia u kum u Nongialam ba hakhmat jong ka Seng ban shakri ia ki paid ka Ri-Bhoi.
U samla Ferdynald ula ong, ki dang don shibun ki mat ki jura ha Ri Bhoi bad ha ka jylla hi baroh kawei ba ka seng ka dang hap ban treibor bah ha ka ban iada kyrpang ia ki paradoh ki parasnam ha ka jylla.
Ula ong ha haduh mynta kawei na ka mat kaba ka seng ka dang pyrshah ka dei ka jingthmu ban wanrah ia ka lynti rel ha ka jylla katba ka sorkar jylla kam pat lah ban wanrah ia kita ki ain ne ki jingiada kiba kyrpang ia ki paradoh ki parasnam hapoh ka jylla.
