Shillong, K’lyngkot 3 : Katba ki briew ki dang pdiang ia ka jingwan u snem thymmai, kawei ka Longiing ha Shillong kala hap ban mareh sha Hospital ban pyllait ia u Khun na ka jingma hadien ba u shah dung ha ka 1 tarik Kyllalyngkot.
Une u samla ba shah dung u kyrteng u Deva Kharkongor ba 23 snem ka rta bad la pynkit ia u sha NEIGRIHMS, Shillong ban ioh jingsumar. Ula mynsaw jur hadien ba u shah dung da ka khanshi na ka krung bad na ka khmat ka mon ha ka por 9:38 baje mynmiet ha Ghumti Parking Lot kaba don ha Contonment Area, Shillong.
Ka kmie une u samla kong Mera Kharkongor, kala leit ban ujor da ka ejahar ha Jhalupara Police Outpost halor kane ka jingjia bad jer kyrteng ia uwei u briew uba kyrteng u Saidin Ali. Hynrei haduh mynta, ki Pulit kim pat ioh kem satia ia une u briew.
Ka khubor ka iathuh ba u Saidin Ali u dei u briew uba la don dak sniew lypa bad uba la shah kem halor kine ki juh ki kam.
