Agartala, Risaw 18 :Ka jylla Tripura kala sakhi ia ki jingiaumsnam kiba la mih halor ki jingkynnoh kiba iadei bad ki kam sain hima sima naduh kine ki khyndiat sngi ba la dep.
Ha kawei na kiba kum kine ki jingjia uwei u samla nongialam jong ka liang pyrshah CPI-M ha Tripura la kynnoh ba ula shah bom iap ha ki katto katne ki kynhun riew runar ha kane ka janmiet sngi Thohdieng ba la lah.
Na ka liang ka CPI-M ka Tripura kala kynnoh ia ka jingdonkti jong ka BJP ha kaba iadei bad ka jingshah pyniap jong utei u samla nongialam jong ka party kaba la jia hapoh Gomti district.
Hynnin ka sngi Nyngkong, ka CPI-M kala pynlong ia ka jingiakhih pyrshah halor katei ka jingshah pyniap jong utei u nongialam da kaba byrthen ruh ban pynthut ia ka jinglong jingman ha ka jylla lada ym lah ban khanglad shisyndon ia kiba kum kine ki kam pyntriem.
Ka CPI-M kala dawa ruh na ki pulit ka Tripura ba kin shim mardor ia ki lad jingpynshitom pyrshah ia ki runar kiba donkti ha kaba pyniap ia utei u samla nongialam jong ka party CPI-M 26 snem rta.
Une u nongialam jong ka CPI-M youth wing u Tapas Roy la kynnoh ba ula shah bom iap ha ki katta katne ki riew runar jong ka BJP hadien ba ula kyntait ban siew pisa na ka bynta ka jingpynlong ia ka jinglehniam Kali Puja hapoh ka shnong ka jong u.
U Roy u dei u nongshong shnong jong ka Chelagang Subhash Colony kaba hapoh Amarpur ha Gomati district ka Tripura.
Na ka liang ka CPI-M kala kynnoh ruh ba ki nongtrei jong ka BJP kila pynjulor ruh ia ka iing ka sem jong u Tapas Roy bad kila thombor tyngeh ruh ia u lem bad ka kmie jong u.Hynrei ia kine ki shikmie shikhun la lah ban pyllait noh da ki pulit ka Tripura kiba la pynkit noh ia ki shapoh hospital.
Hadien kane la pynkit noh ia u Tapas Roy shapoh Agartala government medical college hospital haTripura hapdeng ka jingmynsaw kaba jur.Hynrei hadien u Roy ula khlad noh ha kane ka sngi U Blei ba la dep.
Na ka liang kiba haiing hasem jong kitei ki lanot kila ujor da ka FIR pyrshah ia kitei ki runar jong ka BJP, hynrei na ka liang ka CPI-M kala kynnoh ba ki bor pulit ka Tripura kim pat shym la shim ia kino kino ki lad jingpynshitom lane ban kem ia kito kiba donkti ha katei ka kam pyntriem.
Ha kawei pat ka jingjia ka jingiakynad kala bteng haduh hynnin ka sngi Nyngkong ha ki thain ba marjan jong ka shnong Rangauti kaba hapoh Kailashahar, Unakoti district ha ka thain shatei ka Tripura namar ka jingiakynad hapdeng ki nongkyrshan jong ka sorkar synshar BJP bad ka liang pyrshah Congress ha kane ka miet sngi Saitjain ba la lah kaba la wanrah ka jingmynsaw ia ki arngut ki nongtrei jong ka BJP.
Ka BJP kala kynnoh da kaba ong hadien ba ki nongkyrshan jong ka party ki dang wanphai sha la iing na ki kam jong ka party ha Rangauti Bazar, ki runar jong ka seng Congress kila thombor ia ki da ki tiar pynmynsaw bad kaba la wanrah ka jingmynsaw ia ki nongtrei jong ka BJP kiba kynthup ia u Malik Ulla, Pulab Dutta bad u Matasir Ali.
Hadien kane u Matasir Ali ula jah rngai noh bad ym shym la lapdien ia u.Ha kawei pat ka liang ka Congress kala kynnoh ba ki nongkyrshan ka BJP kila thombor kynsan kynsan ia ka ophis jong ka party bad pynjulor ia kiba bun ki jingdon jingsat.
