Tura, Rymphang 5: Lai ngut ki suba runar kiba donkti ha ki kam tuh, kila shah bom shnong ha ki paidbhur ha ka thain Rangsakona jong ka South West Garo Hills kaba lam sha ka jingiap ki arngut katba uwei pat ula mynsaw jur. Kane ka jingjia kala jia hynnin ka miet sngi u Blei.
Ki Pulit na Garobadha Outpost kila ioh jingtip halor kane ka jingjia ba don ki riew runar kila shah bat ha ki paidbhur ha ka shnong Jaluagre (Mangsanggittim) village.
Haba ka kynhun pulit kila poi ha ka shnong, kila lap ia 3 ngut ki briew kila shah bom shnong bad shah bat ha ki paidbhur harud surok.
Ki pulit kila shimti noh ia kine ki briew bad pynkit mar mar sha Garobadha primary health centre hynrei ha ka por ai jingsumar, arngut kila iap noh namar ka jingmynsaw jur.
Kine kiba iap ki kyrteng u Balen G. Sangma (30 snem) na ka shnong Skagre, bad u Sken D. Shira (30 snem ) uba dei hi na Skagre,South West Garo Hills.
U briew ba dang im u don mynta ha hospital bad la ithuh ia u da u Betuwel D.Shira (22 snem) na ka shnong Arenggre, South West Garo hills. La pynkynriah ia une u briew sha Civil Hospital, Tura ban ai jingsumar ba paka.
Na kane ka jaka ba jia, ki Pulit kila ioh kurup ia kawei ka Maruti 800 ba don u nombor B/R AS -15-7176 bala pyndonkam da kine ki laingut ki briew, u dieng ba khah snam, ka mobile phone, ka wait khukri, ki ID, ka pisa ba T. 1700 bad ka muhor ha ka kyrteng u Chairman ka United Garo People Forum (UGPF), South Western Zone Ampati HQ Tura bad ka notebook ba don ia ka kyrteng ki nongkit kam ka United Garo People Forum (UGPF), Ampati Zone, South West Garo Hills.
Ki Pulit kila file ia ka suo moto case halor kane ka jingjia bad ka jingtohkit mynta kala iaid shakhmat.
Kat kum ka jingong ki Pulit, 2 ngut napdeng kine ki laingut ki dei kiba la shah kem teng halor ka jingle kam bymman ba kynthup ia ka kam pyniap briew, rahbor ban dawa pisa, khrong pisa beain, kam kieng atiar bad kiwei kiwei ha South West Garo Hills.
