Shillong, Nailur 08 : Kawei ka bos tourist na Assam bad ki passenger kynthup ki Kynthei bad Khynnah, kila shah bat ha ka sngi Saitjain haduh palat 14 kynta khlem bam bad khlem um, ha ki Pulit namar ka jingpyrshang ban iaid lynti na ka jingkieng Umiam, kaba khang ia ki kali ba khia palat 4 metric ton ban iaid lyngba.
Kat kum ka khubor, la kam ba u nongniah jong kane ka bos, um shym la tip satia ba la khang ia ki kali ba palat 4 metric ton ban iaid lynti na ka jingkieng. Kane k abos katba ka dang pyrshang ban iaid lyngba, kala tynrah ia u khilon bala pyn ieng hajan jong ka jingkieng.
Mar kumta hi, ki Pulit kiba don marjan ka jingkieng, kila bat ia kane ka bos bad kumjuh ruh ia ki passenger hapoh Thanad.
“Ki passenger jong ka bos, kiba dei baroh ki nongshangkai pyrthei, kila shah bat bad kila hap sah baroh shimiet hapoh ka bos khem bam khlem dih. Kila hap shong khop ha bos haduh 15 kynta eiei” ong uwei u briew ba shah bat ha kane k abos (u bym kwah ban pynpaw kyrteng).
Ki don kiba pynksan ba ki Pulit ki don ka hok ban bat ia kane ka bos namar ka jingleh tam hynrei namar ba ka dei ka jing pynkhein kyndon kaba rit bad ba dawa tang ka jingdain kuna, ia ka bos bad ki passenger lah dei ban pyllait noh hadien ka jingdain kuna.
“Hynrei kane kam shym la jia satia kumne. Ha ka nam ban pyntreikam ia ki kyndon, ia k abos la bat hapdeng 14-15 kynta watla ki kynthei bad ki khynnah kila don hapoh kane ka bos bad kila hap ban sah baroh shimet khlem bam bad khlem um” ong une u briew.
Ia kane ka bos la pyllait noh ha ka step Sngi U Blei ha ka por 10 baje eiei hadien ka jingsiew ia ka kuna kaba kot T.2000.
“Balei kim shym la dain kuna ia ka bos naduh ka janmiet sngi Saitjain lada dei ba hap dain kuna. Balei ba hap bat baroh shimet” buh jingkylli kiwei pat ki passenger.
Kila ong ba kum kine ki kam jong ki Pulit kan nym iarap satia ban kyntiew ia ki kam jngohkai ka Meghalaya, kaba ka Sorkar kala pyrshang radbah ban kyntiew. “Hato kum kine ki kam kin kyntiew ia ki kam jngohkai ha Meghalaya” buh jingkylli uwei pat u passenger.
.){kind=link}