Guwahati, Nailur 08 : Sa shisien ka jingkyntur pud jong ki shipai People’s Liberation Army (PLA) ka China shapoh u pud u sam ka India ha ka thain Kapapu jong ka Arunachal Pradesh, kala pynkyndit ia ka Sorkar India.
Kat kum ka khubor, ki shipai PLA kila wan rung haduh 60 km shapoh u pud u sam ka India ha Arunachal Pradesh. Kila rung na ka thain Kapapu kaba hap hapoh ka Anjaw District la katto katne por.
Ki dur ba thang ding, ki jingtah rong ha ki maw bad ki marbam jong ki China la lap na ka thain kaba pyni ia ka jingwan rung jong ki shipai China kala jia la kumba shitaiew eiei.
Ki dur ki pyni ruh ia u dak thoh bad u snem, ka dak ba ju leh da ki shipai China haba ki wan rung shapoh u pud u sam ka Ri India ban kam trai ia ki jaka.
Ha u Nailar 2022, ki video kila saphriang ha ki social media ba pyni ba ki shipai PLA kila leit jngoh ia ki jingtei hajan ka Hadigra Lake, ha ryngkat bad lai tylli ki puh shilum ba trei ha kane ka jaka.
Ha u 2020, ki shipai China kila rung sha u pud ka India ha Dibang Valley District. Ha u 2019, ki shipai PLA kila shna ia ka jingkieng dieng halor ka Doimru Nalah, kaba jngai kumba 49 km shapoh u pud u sam ka India ha Amako Camp.
Ka ktem ba khatduh eh jong ki Indo-Tibetan Border Police (ITBP) ba marjan ka Hadigra Pass ha ka McMahon Line ka dei kaba don ha Kapapu katba ka Chaglagam, ka administrative circle ba jan dei ha Anjaw District, ka jngai kumba 90 km na McMahon Line.
