Tura, Risaw 12 : Ka khubor kaba kmen kaba poi sha ki paidbah jong ka thain Siju, South Garo Hills hadien ba ka Sorkar Meghalaya Democratic Alliance (MDA) ba ialam da u Conrad K Sangma kum u Myntri Rangbah, kala rai ban pynkha ia ka Community & Rural Development Block (C&RD) ha Siju ha ki khyndiat taiew ban wan.
Kat kum ka khubor, u Myntri Rangbah ka Jylla dalade u lah ban leit plie hi ia kane ka Ophis jong ka Block ba thymmai ha ka 25 tarik mynta u bnai Risaw.
Kane kan dei ka C&RD Block kaba 5 ha South Garo Hills bad kaba 21 ha Ri-lum Garo baroh kawei.
Ka jingdawa ia ka C&RD Block ha Siju ka dei kaba la slem bah bad ki nongshongshnong ka thain ki ju ud ju nam bha halor ka jingsahdien namar ki artylli ki Block, ka Rongara bad Baghmata C&RD Block, kila kham jngai na ka thain.
Ban nang pynjynjar shuh shuh ia ki nongshongshnong, ka jingther u lapbah ha u bnai Jylliew mynta u snem, kaba la wanrah ia ka jingpoi umsaw bad jingshlei um ba shyrkhei, kala pyndkut lut ia ki lad pyniasoh sha ka thain ha kaba bun ki bynta jong ka surok bad ki jingkieng kila shah rong ha ka umsaw bad shah kah lynti ha ka jingtwa khyndew.
U Myntri Rangbah ka Jylla Conrad K Sangma dalade ula hiar ban leit jngoh ia ka Siju bad ula kyntur ia ki Ophisar ba kin maramot lut ia ki jingjulor baroh ban pyllait ia ki paidbah na ki jingeh.
U Myntri Rangbah u ngeit skhem ba da ka jingpynkha ia ka Block ha kane ka jaka kan plie lyntu ia ka jingwan jong ki kam pynroi ha kane ka thain,kaba dei ka jaka ba khring duh ia ki nongshangkai pyrthei ha Ri-lum Garo hashuwa ban shah pynjulor ha ka umsaw mynta u snem.
Ka Siju ka dei ka jaka ba mihkhmat da u Myntri Rangbah ba nyngkong eh ka Jylla u Captain Williamson A Sangma.
