Nongpoh, Nailur 14: Ki Nongshongshnong ka Umdiker, Zero Point, Ri-Bhoi, kila shad kmen bad phuhmut phutmat da ka jingioh ia ka Iingskul ba paka iala ki Khun ki Kti, kaba la pynshna kyrpang da ka kynhun Society for Action in Community Health (SACH).
Kane ka Iingskul ka dei ka Umdiker Lower Primary bad Upper Primary School bad ka SACH kala pyntei thymmai ia ka Iing skul da ka maw, ia kaba la bei tyngka da ka HDFC Bank.
Ka SACH bala ialam da u U Venugopal.MK, kala aiti noh ia kane ka Iingskul sha u Headmaster ka skul Bah Barristerfield Lyngdoh ha ka jingiadonlang u Branch Manager ka HDFC Bank, Nongpoh Jayanta Mundoi, u Rangbah Shnong ka Umdiker Bah S Sohktung bad kiwei kiwei.
Ka SACH nalor ba kala pyntei ia ka Iingskul ba paka, kala pynbit pynbiang ruh ia ki jingdonkam baroh jong kane ka Iingskul ba kynthup naduh ki ben shnong, ka kamra buh kot, ka bording elektrik, ki pangkha ban pynpangad ia ki khynnah skul ha ka por shit bad kiwei kiwei ki jingdonkam.
Ka Society for Action in Community Health (SACH) kadei ka kynhun kaba ïaleh ban wanrah ïaki jingmyntoi bapher bapher sha ki shnong Nongkyndong naduh ka pule puthi, ka roi ka par, ka koit ka khiah, ki kam ri jingri bad kiwei kiwei bad ban pyntyllun ïaki kam jong kane ka kynhun la bei tyngka kyrpang daka HDFC Bank.
Ka SACH ka don ka jingthmu ban wanrah ïaki jingmyntoi ïaki shnong bapher bapher kiba hapoh jong ka them Ribhoi District bad ïa mynta ka la jied ïaki 15 tylli ki shnong jong ka Umsning Block bad ka Shnong Umdiker kadei kawei napdeng jong kine ki 15 tylli ki shnong.
Ki jingmyntoi kiba wan lyngba jong Kane ka SACH kam dei tang ha Kane ka Skul, hynrei ka la dep ruh ban wan rah shibun ki kam pynroi ha kane ka Shnong ba kynthup ïaki Tyngki um bam, ka Public Toilet, ki Sorlar Light bad kiwei kiwei kiba kynthup naduh ki kam ri jingri bad ki kam rep kam riang.
U Jayanta Mundoi Branch Manager HDFC Bank Nongpoh, Branch, haba kren ha katei ka jingïalang, u la ai khublei ïaki Nongpynïaid skul ba ki la long kiba kloi ban snohkti lang naka bynta ban wan rah ïaka jingmyntoi ïaki khynnah skul. U la kitbok ruh ïaki nonghikai ba kin dang lah ban ai ka jinghikai kaba bit ba biang naka bynta ki khynnah skul bad ba kin hikai ruh ïaki ba kumno ban long ki khynnah kiba tista ban wan sha skul.
