Aizawl, Naiwieng 16: Ar sngi hadien ka jingtwa khyndew kaba shyrkhei hapoh Hnahthial district ka Mizoram, ki kynhun aijingiarap kila ioh ban sei sa laitylli kiwei pat ki metiap na ka par tylliat maw kaba don hapoh ka shnong Maudarh bad kaba la kyntiew ia ka jingdon jong baroh kiba iap ha kane ka jingjia sha ka 11 ngut kynthup ia uwei uba dang jah rngai.
Napdeng kitei ki 12 ngut ki briew, saw ngut ki dei ki nongtrei jong ka ABCI Infrastructures Pvt Ltd katba phra ngut ki dei ki nongtrei jong ki kontraktor,ong u Dy. Commissioner jong ka district.
Haduh santylli ki kali puh shilum nalor kawei ka kor tylliat maw bad ka drilling machine kila shah tep noh ha kane ka jingtwa.Kane ka jaka kaba la twa kala kot ha ka jingjngai kaba haduh 5,000 square mitar, ong shuh shuh u DC.
Ia kane ka kam aijingiarap la pyniaid shakhmat hapoh ka jingkhmih jong ka tnat National Disaster Response Force (NDRF), ki district, ki bor shipai na ka tnat Assam Rifles bad Border Security Force (BSF) nalor ki volunteer kiba dei ki trai shnong jong ka thain, ong ki tyllong khubor.
Kham hashwa na ka liang u Superintendent of Police (SP) ka Hnahthial u Vineet Kumar ula ong ba kane ka jingjia ba sngewsih kala jia ha kane ka janmiet sngi Nyngkong ba la lah hapoh ka shnong Maudarh kaba jngai tang kumba 45 minit na ka sor rit Hnahthial.
Ki don 13 ngut ki briew kiba dang pyntrei ha katei ka jaka hadien ba katei ka jingtwa khyndew ba shyrkhei kala wan jia kynsan hapoh ka par tylliat maw ha kaba uwei na ki nongtrei ula ioh lait phet na na kane ka jaka, ong u SP.
Na ka liang ki sakhi kila ong ba kine ki nongtrei kila tih jylliew palat bad kaba la buh jingma ia kane ka jaka tylliat maw bad kaba la pynlong ia u lum baroh uwei ba un twa bad pynjah rngai ia kine ki nongtrei.
Kane ka par maw ka dei kaba la long trai da ka kompeni ABCI, kaba dang pyntrei ha kaba iadei bad ka jingpynheh ia ki bynta jong ka surok national highway-54 hapdeng ka sor rit Hnahthial bad ka shnong Dawn.
Ki tyllong khubor heh sorkar ki iathuh ba katei ka kompeni kaba pyntrei ia katei ka kam kan pynkhreh ha kaba iadei bad ka jingpynkynriah noh ia ki metiap jong kitei ki lanot shala ki jong ki shnong.
