Shillong Risaw 29: U General Secretary jong ka seng Hynniewtrep Achik National Movement (HANM) Bah Kyllang Thongni ula pyntip ba palat spah ngut ki dkhot ka seng kin leit sha nongbah Delhi ha ka 1 tarik u Naiwieng ban pynlong ia ka jingiakhih da kaba shong kyllain mungor ha Jantar Mantar ha ka 3 tarik u Naiwieng ban dawa na ka sorkar pdeng ia ki lai tylli ki mat kiba ktah ia ka jylla Meghalaya.
U Bah Kyllang Thongni ula pyntip ba kawei ka jingdawa ka long ba ka sorkar pdeng ka dei ban burom ia ka rai jong ka ïing dorbar thawain ban pynrung noh ia ka ktien Khasi bad Garo ha ka khyrnit kaba phra jongka riti synshar ka Ri India kaba kum ka jaidbynriew Khasi bad Garo kila dawa la slem bha namar kila biang namar ia kine ki ktien la pule ha ki skul bah haduh ka kyrdan Ph.D.
“Kaba ar ka long ba ka sorkar pdeng dei ban pyntreikam noh ia ka Bengal Eastern Frontier Regulation Act 1873 kaba ka ïing dorbar thawain ka jylla Meghalaya kala mynjuria ka Resolution ban pyntreikam ia kane ka aiñ ha Meghalaya ban iada na ka jingwantur kyrthep ki briew kiba na bar ka jylla” la pynpaw u Bah Thongni.
Ula ong ba ia kitei ki ar tylli ki rai kiba la pdiang da ka iing dorbar thawaiñ ka jylla Meghalaya kala dep ban phah sha ka sorkar peng, hynrei kaba sngewsih ka long ba ka sorkar pdeng hapoh ka jingialam ka BJP kam shym leh ei ei haduh mytna.
Kumta ban kyrshan ia ka jingdawa bad ka Resolution jong ka ïing dorbar thawaiñ ka jylla, ka seng HANM ka shim ba kane kadei ka iap ka im jong ka jylla kumta ym dei ban shu kynton beit tang ha ka ïing dorbar thawaiñ ka jylla, hynrei kum ka seng kaba don ka jingkitkhlieh, ka hap ban leit ban pynlong ia ka jingiakhih sha Delhi.
Katba u President ka HANM Bah Lamphrang Kharbani ula pynpaw ban iakhih ha Shillong ka ktah ia ki paidbah, kane ka kam, kaba sah dei ha ka sorkar pdeng kumta ka seng kala shim ia kane sienjam ban leit sha nongbah Delhi ban pynlong ia ka jingiakhih ban pynpaw sha ka sorkar pdeng ba ki paidbah ki donkam ia ka jingiada.
