Shillong, Nohprah 05: Ka Inter-Academy U-14 Boys bad U-19 Girls Cricket Tournament mynta ka dang iaid shakhmat ha Don Bosco Mini Stadium jongka St Anthony’s Higher Secondary School.
Ia kane ka jingiakob ialehkai Cricket kaba nyngkong eh na ka bynta ki khynnah pule ka nongbah bad ki district, la pynlong da ka Salesian Youth Movement, St Anthony’s HSS ha ka jingiatreilang bad ka Meghalaya Cricket Association (MCA), kaba ialeh ban kyntiew ia ka jingialehkai na ka bynta ki khynnah bad ki samla ka jylla.
Ka St Anthony’s Academy B kala pynrem ia ka East Khasi Hills Cricket Academy da 53 run.
Ha kane ka jingialehkai kaba tang 15 over, ka St Anthony’s kala tied nyngkong bad kamai 104 run bad hap lut ki nongtied ha ka 14 over, ha kaba u Abhinav Khanal ula kamai 24 run bad u Mehdi ula ioh 12 run, katba ki Nongkawang bol ka EKHCA u Lumshua Marbaniang bad u Othaniel L Nonglait kila khur mar 3 wicket.
Ka EKHCA kam shym la lah ban ialehkai bha ha kaba u Pynkhraw Jomati ula kamai 10 run bad u Banskhem Thawmuit uba la mih khatduh eh ula kamai 15 run bad ym shim la out. U Rajbeer ula ioh khur 2 wicket bad ka EKHCA kala kamai tang 51 run bad kala rem noh da 53 run.
Ha kane ka Tournament kiba iashimbynta ki kynthup ia ki 6 tylli ki kynhun jong ki shynrang bad 2 tylli ki kynhun jong ki kynthei kiba kynthup ia ka Shillong Cricket Academy ha Lawsohtun, St Anthony’s Cricket Academy, Nongthymmai Cricket Coaching Centre bad ka East Khasi Hills Cricket Association Academy.
Kane ka lympung iakob kala sei ia ki nongialehkai kiba tbit.
U Honorary Secretary ka MCA u Bah Gideon Kharkongor haba kren haka jingplie ia kane ka lympung ialehkai ula iaroh ia ka St Anthony’s kaba la trei shitom ban pynlong ia kane ka jingiakob ialehkai Cricket naka bynta ki kynthei bad shynrang bad ula ong ba ka MCA ka kwah ban iatreilang bad ban ai jingkyrshan ia ki jaka pule kiba pynshlur ia ka jingialehkai Cricket.
Ki Tournament kiba bun jait naduh ki rta kiba dang rit kin iarap ia ki nongialehkai ba kin pynkhreh bha ialade ha ki kyrdan kiba heh, la ong u Bah Gideon.
Ka jingiakhun ia ka semifinal lashai kan long ha ka por 10:30 mynstep hapdeng ka Shillong Cricket Academy A pyrshah ia ka Shillong Cricket Academy B bad ha ka por 1 baje mynsngi ka St Anthony’s Cricket Academy A kan iakhun pyrshah ia ka St Anthony’s Cricket Academy B.
