Shillong, Nohprah 05 : U National General Secretary ka NPP bad Symbud Myntri Rangbah ka Jylla Bah Sniawbhalang Dhar ula pyntip ba ula pyrshang ban khot ia ki nongialam na ki seng sain pyrthei bapher bapher ba kin wan iasoh noh sha ka NPP.
“Nga ruh nga leh ia kane bad nga la khot ia kiwei ki Nongialam ban wan iasoh sha ka Party” ong u Bah Sniawbhalang haba jubab ia ka jingkylli la u President ka MPCC Bah Vincent H Pala, ula kyrpad ia u, kum u nongialam barim, ban wan phai biang sha ka party Congress kaba la rim duh.
“Kaei kaba u Bah Pala u leh, ula leh na ka bynta ka party lajong. Nga ruh nga la trei na ka bynta ka party lajong. Kam don satia kano kano ka jingleh bakla ia kane. Baroh ki kwah ban pynkhlain iala ka jong ka party. Kam don jingeh ia kata” ula bynrap.
Haba pynpaw ba ka NPP ka dei kaba biang tam, u Bah Sniawbha ula ong ba baroh kiwei ki seng sain pyrthei kum ka Congress bad UDP ki lah ban ong ia kajuh ka kyntien ba ki party jong ki, ki dei kiba biang tam.
