Shillong, Rymphang 19 : U Symbud Myntri Rangbah ba khmih ia ki kam pynroi sor Bah Sniawbhalang Dhar ha ka sngi Palei ula pyntip ba ka project shna madan pynlong tamasa ba bun jait (multi-purpose event ground) ha ka jaka ba 17 acre ha New Shillong ka dang iaid mynta, ia kaba la mang pynlut haduh T.101 klur.
“…ka project kala iaid shaid shaid katba nga dang kren hangne….ka madan tamasa kan don hapoh ka Knowledge City ha New Shillong, ka ban don marjan ka Stadium, kaba la mang pisa haduh T.101 klur bad kane ka madan kan ngiam haduh 60-70 hajar tam ki briew nalor ka jaka pynieng kali ha Mawkhanu marjan ka Football Stadium” ong u Bah Sniawbha haba jubab ia ka resolution bala wanrah da u MLA ka North Shillong Bah Adelbert Nongrum ha Iingdorbar.
Ula kren halor ka thong jong ka Sorkar ban pynlong ia ka Shillong kum ka sor ba thaba bad ba don lut kiei kiei baroh, bad ka jaka paidbah ka ban plie ia baroh.
Ka sienjam kum ka jingpynkylla dur ia ka Nan Polok, ban pynitynnad biang ia ki rud Wahumkhrah bad kyntiew kyrdan ia ka Phan Nonglait Park kila iaid shakhmat.
U pyntip ba ia ka jaka ba don harud ka Wah Umkhrah ha Polo, la shna pynitynnad ia ka kum ka Meghalaya Riverfront Project ba nyngkong eh, kaba la iaid shaid shaid mynta bad kane kan sa pynthaba ia ka thain da ki madan jyrngam, ki jaka iaid kjat, bad ki jaka iakynduh ba shngain jong ki samla kynthei bad shynrang.
Hapdeng eh jong ka sor, u Bah Dhar ula ong ba wat ia ka thain Barik la shna ia ka kum ka Open Public Plaza bad kane ka project ka thmu ban pynkylluid ia ki surok nalor ban ai jaka ia u paidbah ba un pyndonkam. Kumjuh ruh ia ka Phan Nonglait Park la kyntiew kyrdan da ki jingshna ba kham bha, ka lynti iaid ba shngain ia ki nongleit nongwan bad kiwei kiwei.
 ha ka jaka ba 17 acre ha New Shillong ka dang iaid mynta, ia kaba la mang pynlut haduh T.101 klur.){kind=link}