Shillong, Naitung 21 : U shynrai Lakadong ba pawnam ka Meghalaya ula ioh ia ka jingkyrshan kaba radbah da ka jingsdang pyntreikam ia ka Mission Golden Spice ba T.175.45 klur, ka mishon ba thmu ban kyntiew ia ka jingpynmih, jingpynkhlain ia ka jingtylliat bad rah ia une u jynshoh sha ki Iew ka pyrthei haba kyntiew ia ka kamai ki nongrep.
Ka mission bala pynlait da u Myntri ka Development of North Eastern Region (DoNER) Jyotiraditya M. Scindia bad u Myntri Rangbah ka Jylla Conrad K Sangma, kan kynthup ia baroh ki kam naduh ka por ba rep bad ka jingai syrnot haduh ka jingtylliat, ai kyrteng bad shalan.
Da ka jingbei tyngka lang ka DoNER Ministry bad ka North Eastern Council (NEC), ka Ministry of Agriculture bad ka Sorkar Meghalaya, ia ka mishon yn sdang pyntreikam naduh u 2026 haduh u 2030 ha West Jaintia bad East Jaintia Hills baroh kawei, kaba pynmih ia u shynrai Lakadong ba don ia ka curmimin ba bun bha.
Ka mishon ka thmu ban pynheh ia ka jaka rep na ka 2,500 hectare sha ka 7000 hectare, pynbun ia ka jingpynmih sha ka 49,400 metric ton hapoh u 2030 bad kyntiew ia ka kamai ki nongrep sha ka T.80 shi kilo. Kane ka mishon kan ai jingmyntoi ia palat 17,500 ngut ki briew, haba buh hakhmat ia ki kynthei kaba long haduh 99%.
Haba ai jingkren, u Myntri ka DoNER Jyotiraditya M Scindia, ula ong ba ka jingialang ka dei ka dak jong ka jingpynlait ia ka Mission Golden Spice kaba pyni ia ka thong u Myntri Rangbah Duh, Narendra Modi na ka bynta ka roi ka par jong ki Jylla ka thain Shatei Lam Mihngi, kaba kynthup ruh ia ki jingtei ba kynsai ka Jylla bad ka roi ka par ha ka imlang sahlang.
“Ki Jylla ka thain Shatei Lam Mihngi kim dei shuh tang u pud ka jingpynroi hynrei kila kylla long ki jaka pdeng jong ka roi ka par ka ri India” ula ong.
Ula bynrap ba ka thong ka phaikhmat eh halor ka jingpynroi ia ki jingtei bad ki jingpynbiang ha ka imlang sahlang kum ki Iingsah, ka koit ka khiah bad ka pule puthi bad ka kynthup ruh ia ka jingpynroi ia ki jinglah ba kyrpang jong kawei pa kawei ka Jylla haba nujor ha ka thain, ka ri bad ka pyrthei.
U Myntri ula ban jur halor ka jingkongsan jong ka Unique Selleng Proposition (USP) ki Jylla bad ka bynta jong ki Kynthei ha ka imlang sahlang ki nongrep.
U Myntri ula ong ba ka jingsdang jong ka Mission Golden Spice ka dei ka prokram ban wanrah jingkylla da ka jingdon ka lad ban pyniaid iew ha kylleng ki ri ka pyrthei bad bynrap ba kane ka prokram kan pynkupbor ia ki nongrep kynthei, haba ban jur ia ka jingpynkynriah ia ka roi ka par na ka bynta ki kynthei sha ka roi ka par ba ialam da ki kynthei ha India.
Haba ai khublei ia ki nongrep kynthei namar ka jingtrei shitom bad synniang sha ka jingkyntiew ia ka bor jong ka India ha ka rynsan ka pyrthei, ula pyntip ba ka jingkren u Myntri Rangbah Duh shaphang u shynrai Lakadong ka Meghalaya hapoh ka G7 summit ka dei ka jingjop kaba khraw bah. Ula ban jur ia ka jingdonkam ban iapyrshang lang da baroh ban pynthikna ia ka jingioh jingithuh da ka pyrthei ia u shynrai Lakadong kaba la pynshong nongrim ha ka jingbha, ba dei hok, ba khlem khleh dawai bad ba iai neh.
Haba ai jingkren, u Myntri Rangbah Conrad K Sangma ula ong ba ki Jylla ka thain Shatei Lam Mihngi kila iohi ia ki jingkylla hapoh ka Ministry of DoNER hapoh ka jingpyniaid u Myntri, Jyotirasitya Scindia da kaba phaikhmat sha ki bynta kum ka rep ka riang bad ki kam jngohkai.
Ula bynrap ba u shynrai Lakadong u dei uba pher bha na ka bynta ka ri-lum Jaintia bad ula pyni ia ka jingdon ka curcumin ba kyrpang ka bym lah ban don ha kiwei pat ki thain wat hapoh Meghalaya. “Ka rukom long ka khyndew bad ka sawdong sawdong ha West Jaintia Hills bad East Jaintia Hills ka pynthikna ia ka jingbha u shynrai Lakadong, kaba pynlong ia u kum u mar ba dei eh na ka bynta ka mission” ula ong.
U Myntri Rangbah ula kren ruh halor ki jingai jingmyntoi jong kane ka prokram ia ki nongsengkam kynthei bad nongrep da ka jingkylla ka jingim ki hajar ngut namar u shynrai Lakadong bad bynrap ba ka mission ka wan ha ka por kaba dei eh naba yn iarap shikatdei eh na ka bynta ka jingkiew bad ka roi ka par ha kane ka kam.
Ula pyntip ruh ba ka Jylla kala pynthikna ia ka jingpynmih mar na ki marrep bapher bapher da kaba ai ia ki kor technology bad ka jingiarap song pisa. “Ka baikheng ka don na ka bynta ki nongrep, ki SHG bad ki kynhun lyngba ka song pisa bala buh da ka Jylla, kaban weng syndon ia ka jingkhuslai ki nongrep halor ki kyndon ka Bank bad jingbuh bynda”.
Kiba iadonlang ha kane ka jingialang ki kynthup ia ka Sukanta, Majumdar, Myntri Khynnah ka MDoNER, Secretary, MDoNER, Nivedita Shukla, Commissioner & Secretary, Meghalaya, Dr Vijay Kumar D bad ki nongmihkhmat na ki kompani Dr Hemanth Kumar Manikyam, Ziran India.
