Nongstoiñ, Nailur 22: Ka Hills State Peoples Democratic Party (HSPDP) kala tei mynta da u mot jong u Bah Hopingstone Lyngdoh (Bam Kwai Ha Dwar U Blei) ha kliar jong u Lum ka shnong Mawphanlur, ban pynsah nam ia une u Nongiakhun Hill State bad ruh u Nongseng jong ka Party ha Jylla.
“Ka jingpynieng ia u mot kala nang iaid shakhmat bad ngin sa plie ia u ha ka lyngkhuh snem ba hynriew ka jingkhlad noh jong u Bah Hopingstone Lyngdoh, kaba hap ha ka 26 tarik mynta u bnai” ong u Bah K P Pangniang, President ka HSPDP haba iakren bad u nongthoh khubor.
Une u Nongialam ka HSPDP ula pyntip ruh ba une u mot, ka seng kan buh jingthoh ruh ia ki kyrteng jong baroh ki Volunteer kiba la iashimbynta ha ka jingiakhih ban dawa Jylla la ka jong na ka Ri India.
U President ka HSPDP Youth Wing-Rambrai Bah Bony Lyngdoh Lyngkhoi ula pyntip ba kane ka jaka ban pynieng ia u mot jong u Bah Hoping ka dei jong ki Khun u Bah Drin Kharbani bad ka Kong Rina Lyngdoh Lyngkhoi kiba dei ki trai khyndew jong ka shnong Mawphanlur kaba hap ha ka Hima Myriaw.
Kat kum ka jingong jong u, kane ka jaka ka dei kaba la leit pan pyndonkam nyngkong eh da ka seng HYC-Mawthadraishan naduh u bnai Kyllalyngkot 2022 hynrei kane ka seng kala kynran dien noh bad kala pynphai ia baroh ki dulir bala ai da ki trai jaka.
Kane ka jaka bala ai sngewbha ban pynieng ia u Mot ka don ha kliar jong u lum uba don shaphang shatei na ki pung bad ki jaka sah kiba la shna na ka bynta ki nongwan jngohkai.
U Bah Bony uba dei ruh u khun rangbah jong kine ki trai jaka, ula ong “Ka jingai sngewbha ia ka jaka ka long namar ba ki don ka jingsngewieit bad sngew jan haduh katta katta ia u Bah Hoping namar ba u dei na katei ka thain nalor ka jingsngew burom ba ka jingioh iala ka Jylla ba pura kala wan lyngba ka jingiohi jngai jong u (Hoping) kum u Nongialam”.
Ha kajuh ka por u la ong ba ka Jaitbynriew Khasi Jaiñtia ka dang long kumne kumba ka long mynta, dei namar ba ka jingsaiñdur jong u (L) bah Hopingstone ban pynneh ïa ka synshar khaddar ha ki it ki hima, ki shnong ki thaw, ki riti ki dustur, ka hok long trai halor ka khyndew ka shyiap kiba u la tynsat ha ki mat trei kam jong ka HSPDP ka seng saiñ pyrthei kaba la rim tam ha ka jylla.
