Shillong, Nailur 08 : Ka Tnad MeECL kala sdang ban shim ia ki rai ba tyngeh ban pynduh ia ka Aggregate Technical & Commercial (AT&C) losses, pyntip u Myntri kam bording ka Jylla Abu Taher Mondal hynne ka sngi Thohdieng.
“Ngi dang jam ha kane ka lynti mynta bad nga lah ban iathuh ha phi ba ha une u snem mang tyngka ba mynta, ngi la nang kham pynduna ia ka jingduh nong ha ka jingpynmih bad jingsam bording. Ngi pyrshang ban ialeh ha kaban kynjoh ia ka National Average kaba dei ka kam kaba jynjar bha” ula ong.
U Myntri ula ong baka percentage jong ka jingduhnong ha ka jingsam bording ha Ri-lum Garo ka lah ban kham heh hynrei “Ka dei ka kamram jong ngi ban pynduna noh kham kloi kat kaba lah”.
Haba iadei bad ka jingpynmih bording ha Jylla, u Mondal ula ong ba ka Jylla kala don ha ka khep bym khuslai shuh watla kiwei ki bynta jong ka Ri kila mad ia ka jingkyrduh bording bad ki Jylla ba marjan ruh kila mad ia ka jingshit kyrang.
“Ha ngi ngi, kumba long mynta, ngim khuslai shuh. Ngi la rai ba kan don ka jingpynlip bording ba tang 2 kynta ha ki jaka sor bad kiwei ki bynta jong ka Jylla kan long 3 kynta. Hooid, kin don ki katto katne ki jaka kiba lah ban kham bun namar ka jinghap pynlip bording naamr ki kam maramot ba iaid hangne hangtai” ula ong.
Ha kajuh ka por, u Myntri ula pyntip ruh ba ka Sorkar ka don jingthmu ban pyndonkam noh da ki aerial bunched cable (ki sainar bala sop lang ha uwei u cable) ha ki jaka ba jur eh ka jingtuh bording.
“Ki don ki jingthmu ha ki jaka ba jur ka jingtuh bording bad ha ki jaka ba bun eh ka jingduhong. Ngi lah ban pyndonkam noh ia ki aerial bunched cables” ula bynrap.
