Shillong, Lber 6: Ka Jylla kala sdang ia ka jingpynkhreh ban lum ia ka Khanasamari ne Census 2027 ha ka jingialang kaba la long ha ka sngi Palei, ha kaba la buh ia ka thong ban sdang ha u Bnai Jymmang ia ka jingleit rung ha ki iingbriew ban jam noh shaphrang ia ka jingslem ka ri naduh u snem 2021.
Ka State Nodal Officer ka Dr Pooja Pandey kala pynpaw ha ki Deputy Commissioners bad ki ophisar kiba khmih ia ka kam Census ba “Ka jingiatreilang kaba ryntih hapdeng baroh kiba don bynta lang ha ka kam kan long kaba kongsan bha na ka bynta kane ka kam kaba khraw, ia kaba yn leh da ka kor Digital ha ka sien ka banyngkong eh.
U Joint Director of Census Operations u Subhasish Chatterjee ula ai ka jingbatai halor ka jingiashimbynta ha kaba iadei bad ka jingwan pynrung kyrteng hi kaban sdang naduh ka 1-15 tarik u Jymmang bad hadien kane yn sa pynbud pat sa ia ka jingleit rung ha ki iing naduh ka 16 tarik u Jymmang haduh ka 14 tarik u Jylliew.
La iakren ruh ha kaba iadei bad ka jingai jinghikai ne Training ia ki nongtrei ne field staff.
Ka General Administration Department kala mynjur ia katei ka tarik bad shen kan sa pynmih noh ia ka jingpynbna paitbah.
Ka Dr Pandey kaba long ruh ka Commissioner & Secretary ka Sorkar Meghalaya, kala plie ia kane ka jingialang kaba la long ha Main Secretariat ha ryngkat ka jingdonlang ki ophisar na ka Directorate of Census Operations.
