Shillong, Iaiong 14 : Ka Jylla Meghalaya kala sakhi biang ia ka jingwan lynshop ka khlam Covid-19 bad mynta kila don haduh 13 ngut ki nongpang ne active case ha ka Jylla baroh kawei.
Ia kane la pyntip da u Health Secretary ka Jylla Ram Kumar ula ong la pynpaw ia ka jingkhmih lynti ban iohi ia ka jingnang kiew ha ka jingdon ki nongpang ha kine ki sngi ban dang wan.
Hynrei, une u Ophisar ula pyntip ba ka Sorkar Jylla kala dep pynkhreh lada jia ba don ka jingsaphriang jong ka jingpang hapoh ka Jylla.
Kat kum ka jingong jong u, tang hynne ka sngi thohdieng, ki don lai ngut kiba la ioh ia kane ka jingpang bad arngut kila ioh pat ia ka jingkoit hynrei kaba sngewtynnad ka long ba ym shym la don satia kiba poi shah sumar ha hospital.
U Ram Kumar ula pyntip ba iaki Covid ward ha ki hospital ki donkam ban hap pyntreikam biang haba donkam ban ai jingsumar ia ki nongpang.
U Ram Kumar u ong ba ka Sorkar Jylla kan sa shong bishar ia ka jinglong jingman hashuwa ban pynmih ia kano kano ka jingbthah ia ki paidbah ba kin bud ia ki kyndon jingbthah jong ka Covid-19.
Ula ong ruh ba ka Tnad kan sa pynkhlain biang ia ka jingdon ki nongtrei da kaba thungkam biang ia ki briew lyngba ka contract lada dawa ka jinglong jingman.
Pule lang ia kane: Rung ka Assam ha ka ‘Guinness World Records’ lyngba ka jingshad Bihu kaba heh tam
