Guwahati, Iaiong14: Kan long ka jingsarong kaba khraw na ka bynta ki nongshong shnong ka Assam hadien ba ka jylla hynnin ka sngi Palei ka la lah ban thaw ia ka ‘Guinness World Record’ lyngba ka jinglah ban pynlong ia ka jingshad Bishu kaba heh tam tang ha kawei ka jaka.
Ia kane ka jingshad Bihu kaba heh tam la pynlong hapoh Sarusajai Stadium ha kaba ki la don haduh kumba 11,000 ngut ki nongshad tynrai kynthup ia ki nongtem nongput bad nongrwai.
Ki nongiashim bynta kiba kynthup ia ki nongrwai bad kito kiba pyndonkam ia ki tiar tem tiar put tynrai ia kiba la tip kum ki dhol, taal, gogona, toka, pepa, xutuli bad kiwei pat.
Ia ki jingai jinghikai ha kaba iadei bad kane ka bynta la pynlong ha ki bynta bapher bapher ka jylla na ka bynta ban wanlam lang ha kajuh ka jaka da ka jingthmu ban rah ia kane ka jingshad bad jingtem jingput tynrai jong ka Assam ha ka map jong ka pyrthei.
Na ka liang u Myntri Rangbah (CM) ka Assam u Himanta Biswa Sarma u la ong ba ka Rongali Bihu mynta u snem 2023 kan dei kaba heh tam lyngba kane ka sienjam kaba la pynlong kyrpang.
Ki nongiashim bynta kiba la pynlut por ban pynkhreh na ka bynta kane ka sngi kaba kyrpang mynta la slem bha ki la ioh ia ka jingjop ha kaban pynpaw iala ki jong ki sap ki phong ha katei ka sngi kaba kyrpang.
Ia ka jingai syrnot ne certificate na ka bynta ka jingthaw rekod yn sa aiti mynta ka sngi ha ka jingiadon ryngkat lang u Myntri Rangbahduh (PM) ka ri u Narendra Modi.
