Shillong, Jylliew 03: Ka sorkar jylla haka 2 tarik u Jylliew kala sdang ban pyntreikam ha ka sien kaba nyngkong ia ki Sustainable Transport and Efficient Mobility Society (STEMS) ne ki STEMS bus na ka bynta ban kit ia ki khynnah skul hapoh ka nongbah Shillong, da ka jingthmu ban pynsuk ia ka leit ka wan, ban pynduna iaka jingdheng kali bad ban pynshlur iaka shong kali kaba shngain.
Ka Chief Executive Officer jong ka Sustainable Transport and Efficient Mobility Society (STEMS), Shillong Kong Isawanda Laloo kala pyntip, da ka jingiatreilang jong baroh ki tnad sorkar, ka rukom pynkhreh kaba biang bad ka rukom ai jingshakri kaba jan ia ki paidbah, ia kine ki bus la pyntreikam da ka jingthmu ban pynkylla ia ki kali kit paidbah bad ban pynbiang ia ki khynnah skul ia ka lad ban don iaka jingshaniah, jingshngain bad ka rukom leit rukom wan kaba suk.
Ia ka jingshakri jong kine ki bus la pynsdang na Umpling Football Ground sha Pine Mount School, ha kaba kila don 12 tylli ki jaka kiew bad ki jaka hiar kiba kynthup ia ka Umpling Football Ground, Nongrah Presbyterian Church, Nongrah Mawshyieng, Nongrah, Lapalang, Lumbatngen (Law U Sib), Demthring Bus Stop, Nongkhyriem, Nongthymmai, Jylli Shop, Fire Brigade bad Pine Mount Back Gate.
Ka Kong Isawanda kala ong ruh ba ka STEMS ka don iaka jingthmu ban sdang pyniaid ia ki bus sha kiwei pat ki lynti bad ki skul ka ban long ha ki wat ki wat bad ki kmie ki kpa ki lah ruh ban tip iaki bus ki don hangno bad ki lah ban bat lypa ia ki jaka shong da kaba pyndonkam iaka mobile application ban bat lypa iaka jaka shong naka bynta ki khynnah skul.
Hapoh jong kine ki bos ki don 5 tylli ki CCTV Camera bad kiba don ruh ia ki GPS kiba lah ban tip ia ka jingdon ka bos ha kano kano ka jaka bad ki jingtip na ka bynta ki nongshong bad ki LED Screen kiban pyni iaka lynti iaid jong ka Bos bad ia kine ki bus la pyniaid bad khmih da ki briew kiba la ioh ia ki jinghikai.
Ka STEMS, ryngkat ka jingkyrshan jong ka Shillong Traffic Police, MTC, NIC, PWD (Roads) bad kiwei kiwei ki tnad ki iatrei ryngkat ban pynthikna ban ai ka jingshakri kaba paka tam ia ki khynnah ha ka nongbah.
Haduh mynta ka STEMS kila 455 ngut kiba la rejistar bad kumba 250 ngut tam ki kmie ki kpa kila pan jingtip bad jingpynshai.
Ka sorkar jylla ka pynshlur ia ki nongshong shnong ka jylla ban pdiang ia kane ka jingkylla ha ka jingkit ia ki nongleit nongwan bad kyntu ia ki kmie ki kpa ban rejistar ialade ban pyndonkam ia kine ki bus ha ka leit ka wan ka jongki.
Na ka bynta ki jingtip kiba bniah halor ka STEMS bus services, lah ban leit ha ka https://stems-meghalaya.nic.in/ ne ban phone ha u Customer Care Helplines 0364-3500097/ 0364-3500098 ha ka por longtrei ne ban email ha ka [email protected].
 ne ki STEMS bus na ka bynta ban kit ia ki khynnah skul hapoh ka nongbah Shillong, da ka jingthmu ban pynsuk ia ka leit ka wan, ban pynduna iaka jingdheng kali bad ban pynshlur iaka shong kali kaba shngain.){kind=link}