Itanagar, Nailar 31: Ki shipai ka tnat Indian Army kila sdang ban pynlong ka jingwad ia ka kynhun jong ki arngut ki nongkiew lum kiba jah rngai naduh ka 17 tarik mynta u bnai.
Ki shipai ba kyrpang ha ryngkat ki dkhot Scout ka Arunachal Pradesh kila iaid shakhmat ban pynlong ka jingwad katba artylli ki liengsuin light helicopter bad artylli ki Cheetah helicopter la pynkhreh lypa na ka bynta ban aijingiarap.
Ki arngut ki nongkiew lum ia kiba la tip kyrteng kum u Tapi Mra uba dei u ba nyngkong eh napoh Arunachal u ban kiew ia u lum Mount Everest bad uwei u paralok jong u, u Niku Dao kila jah rngai noh naduh kine ki hynniew sngi bala dep.
Ia kine ki liengsuin helicopter la pynkhreh ban aijingiarap hadien ba ka suin bneng kan kham ailad.
“Kine ki shipai bad kyrpang ha ryngkat ki Scout na Arunachal kin pynlong ka jingwad napoh ryngkew, kata lyngba ki jaka riat kiba shem jingeh shibun,” ong ki bor shipai hynne ka step sngi Balang.
Ha ka 29 tarik mynta u bnai, ki bor sorkar ha East Kameng district ka Arunachal Pradesh kila ioh jingtip ba ki don arngut ki dkhot nongkiew lum kiba la jah rngai noh ha ki bynta jong u lum Nyegi Kangtsang ha East Kameng district.
Hadien kane ka jinglong jingman, na ka liang ka sorkar Arunachal Pradesh kala pan ia ka jingiarap lem na ki bor shipai Gajarl Corps jong ka Indian Army kaba don ha Tezpur, Assam na ka bynta ban iarap lem ha kaba iadei bad kane ka jingwad.
Na ka liang u Myntri Rangbah (CM) ka Arunachal Pradesh, u Pema Khandu kham hashwa ula pynpaw ka jingsngewkhia kaba jur halor ka jingshngain jong u Tapi Mra, bad pynbna ruh ba na ka liang ka tnat sport ka jylla kala pynkhreh ia ka plan na ka bynta ban lapdien pat ia u.
“Nga duwai na ka bynta ka jingshngain jong u Tapi Mra, uba dei u nongshong shnong ba nyngkong ka Arunachal uban kiew ia u lum Everest, uba la jah rngai noh ha ryngkat u paralok jong u ha kane ka taiew ba la lah katba ki dang leit ban keiw ia u lum Khyarisattam ha EastKameng district,” pynpaw u CM lyngba ka twitter.
