Shillong, Kyllalyngkot 07: Ka nongbah Shillong ia kaba la ju tip kum ka “Scotland of the East” namar ka jingbiang jong ka suinbeng bad ka jingjyrngam ki khlaw ki btap, suki pa suki kala sdang ban duh noh ia kane ka jingitynnad. Nalor ka jingsdang ban duh ia ka dur jong ka jingitynnad kala wanrah ruh ia ka jingshah ktah jong ka mei mariang, ka jingkiew kynsan jong ka Urban Heat Island (UHI).
Katkum ka jinglap jong ki nongwad bniah kiba kynthup ia ka Parimita Saikia, Preety War, Lapynshai M. Umlong bad Bibhash Nath, kila pynmih ha ka Remote Sensing, kila ai ia ka jingmaham ba lada ym long kiba phikir bha ia ka jingkiew ha ka nongbah ne ka land surface temperature (LST). Lada kane ka jinglong jingman kaba mynta ka dang iai bteng, ka nongbah Shillong ka lah ban kiew iaka jingsyaid bad kaba lah ban ktah ia ki paidbah ba kin lah ban im hapoh jong u snem 2050.
Na kaba jyrngam sha ka rong dpei
Ha ki 30 snem kiba la leit, ka jinglong jingman ha ka nongbah Shillong kala don ka jingkylla kaba bak la bak. Kaba shisien la bun da ki pynthor bad ki khlaw kiba jyrngam, ka nongbah kala sakhi ia ka jingkiew jong ki nongshong shnong na ka 6.40% jong ka jaka kaba don baroh ha u 1993 sha ka 17.36% ha u snem 2023.
Ki nongwad bniah na ka Assam Royal Global University, North-Eastern Hill University bad Hunter College na New York kila buddien ia kane ka jingkylla, kaba la ialam lyngba ka jingshna ia ki jingtei kiba thymmai ha ki jaka kiba thylli bad ka jingduh noh ia ki jaka kiba itynnad.
Katkum ka jinglap lyngba katei ka jingwad bniah, la ong ba ki jaka kiba long riat ha Shillong ki don san jait, kata ki jaka rep, ki jaka kiba thylli, ki jaka sah, ki jaka kiba mih ki jingthung jingtep bad ki tyllong um.
Ka jinglap ka long kaba sngew shyrkhei.
• Ki jaka sah (ki iing, surok bad ki kam khaii) kila kiew sted bha
• Ki jaka kiba thylli kila sdang duh noh na ka 40.87% ha snem 1993 sha ka 6.82% ha u snem 2023.
Ka sorkar kala kylla kum kaba khaii na ka jaka kaba jyrngam sha ka jaka kaba rong dpei (Gray)
Ka Sor kaba la sdang mad ia ka jingkhluid
Da kaba pyndonkam ia ka Satellite Imagery bad Advanced CA-Markov modeling, ki nongwad bniah kila pule bniah ia ka jingkylla ka LSTha ki phew snem kiba la leit noh. Ka jinglap ka jongki ka pushara ia ka dur kaba don jingma ia ka nongbah Shillong kaba la sdang ban khluid ha baroh ki jaka kiba don ha ki 5 tylli ki kyrdan.
• Ki jaka sah kidei ki jaka kiba la kiew sted bha na ka 17.45°C ha u 1993 sha ka 21.75°C ha u 2023 (+4.3°C).
• Ki jaka rep bad ki jaka kiba thylli kila sdang syaid sted bha da kaba kiew sted sha ka 4.5°C bad 4.9°C.
• Katba ki jaka kiba don ia ki jingthung jingtep bad ki tyllong um kila don ha ka jingling jingman kaba biang ha kaba la rekod ba kala don ka jingkiew da 4°C.
Ka jingpeit nangne shakhmat
Hapoh u snem 2030, ki jaka shong jaka sah la khmih lynti ba kan kot sha ka 21.39% ia ka jingpyndonkam ia ki jaka ha ka nongbah Shillong bad hapoh u snem 2050, ka lah ban kiew sha ka 28.56%. Kane ka jingpyniar ka lah ban shim shuh shuh ia ki jaka rep, ki jaka thung jaka tep bad ia ki tyllong um kaba lah ban kyntiew shuh shuh ia ka jingktah jongka UHI Effect.
Ka jingwad bniah kala pynpaw ruh ba ka la don ka jingkylla ha ka jinglong jong ka Temperature, ha u snem 1993 haduh 27.95% jongka nongbah kala don ia ka jingling jingman ka Temperature kaba hapoh jongka 12°C. Hapoh u 2023, kine ki jaka kiba long pynngad kila sdang ban jah noh. Hapoh u 2050, ka Shillong kan iohi ba bun na ki jaka kan kiew sha ka 23°C bad kane ka long kaba sngewkhia ia ka nongbah ia kaba baroh shi katta kaba la ioh ia ka jingiaroh ia ka jingbiang jong ka jingling jingman ka suinbneng.
Hato ka Shillong kan dang neh ka jingling pynngad?
Kane ka jingwad bniah kam shym la pynpaw tang ia ki jingeh hynrei kala air uh ia ki lad ban pynbeit ban iarap ia ka nongbah Shillong ban ioh biang ia ka jingling jingman kaba biang kum mynshwa.
1. Pynjyrngam ia ka Sor: Pyniar ia ki khlaw ha ka sor bad ia ki Parl ban iakhun pyrshah ia ka jingkiew jong ka jinghuid.
2. Iada ia ki tyllong um: iada ia ki wah, ki wahduid bad ki jaka kiba sngem kiba long kum ki jaka kiba ai ia ka lyer kaba pynngad.
3. Ki jingpynhreh kiba neh: Pynshlur ia ki jingtei kiba iadei bad ka mariang bad ban pynduna ia ka jingpyndonkam ia ki jaka khyndew kiba eh.
4. Pyndonbynta lang ia ki paidbah : Ai ia ki jingpynsngewthuh bad jingpynshai ia ki paidbah shaphang ka jingling kongsan ban pynneh ia ka jinglong jingman ka mariang bad kumno man la ki riewshimet kin lah ban noh synniang.
Ka jingai jinghikai ha satlak ka pyrthei
Ki jingmad jingeh ka Shillong ki long ki jingiathuhkhana na ka bynta ki jaka sor kiba don ha kylleng ki ri. Haba ka don ka jingpyniar ia ka jingpyndonkam ia ki jaka ha sor, ka bym phikir ia ka jingkiew sted kan pynjulor ia ka mariang kaba don ia la ka jinglong kaba kyrpang.
Ia ka Shillong, ka jingiakhun pyrshah ia ka jingkiew ka jingkhluid kam dei eh tang ban iada ia ka sor, hynrei ka long ban pynneh pynsah ia ka jingling kaba kyrpang. Hato kan ieng ban iakhun ia kine ki jingeh ne ka “Scotland of the East” kan kylla long kum kata ka jaka kaba ym shim la don ia ka jingpynkhreh kaba thikna ban shong ban sah?
Tang ka por hi kan sa batai, hynrei ka por kala nang iaid.
