Shillong Jylliew 17: Ka Tur Shaphrang Football Knockout Tournament kaba la pynlong da ka HYC Mawlai Umjaiur Unit kala sdang hynne ka sngi Saitjain ha Mawlai Madan Heh bad ha kane ka sngi sdang ka Thunder FC kala pynrem iaka Lawmali SC da 3-2 kol.
Ia kane ka lympung ialehkai la plie da u Vice President ka HYC u Bah Donboklang Kharlyngdoh kum u Kongsan bad u Bah Arup Passah kum u Symbud Kongsan uba long u Trai jongka Grace Foundation Centre, Assam da kaba pynher iaka lama jong ka HYC ha ryngkat ka jingdonlang, u President ka HYC Umjaiur Unit Bah T. Nongrem, u Bah Teibor Dohling dkhot ka Mawlai Sports Club bad kiwei kiwei.
Kila don 32 tylli ki kynhun kiban iashimbynta ha kane ka lympung iakob ialehkai phutbol kaba ka matpdeng ka long “Say no to drugs, yes to football” (ong em ia u drok, hooid ia ka phutbol) bad ha kane ka sngi la sam ruh ia ki momento sha kine ki 32 tylli ki kynhun kiba iashimbynta ha kane ka jingiakob ialehkai phutbol.
Ha ka jingiakhun kaba nyngkong jong ka Tur Shaphrang Football Knockout Tournament ka Thunder FC kala jop da 3-2 kol ia ka Lawmali SC.
U Bah Pasah ula ong, ba ula ngop teng ha u drok bad ula kynti ia ki samla ba kim dei ban ktah ia u drok ne ki jingdih kiba sniew namar shisien ba kila ktah kan long kaba eh shibun ban bthat ia u kynjri jong ka jingkyrni bad ula pynpaw ba dei lyngbaka jingsynei u Blei ba ula lah ban kylla ha ka jingim ka jongu bad ioh ia ka lad ban hikai kylla ia kiwei kumno ban lait na u drok.
U Bah Donboklang Kharlyngdoh ula pynpaw ka jingbynniaw halor ka jingkharoi jong kiba kyrni ne dih drok hapoh ka Jylla kaba la poi haduh 2 lak tam bad ula ai khublei ia ka HYC Umjaiur Unit ba kala pynlong ia kane ka phutbol kaba don ia ka matpdeng kaba jingmut bha.
Ula kyntu ia ki nongialehkai ba kin pynmlien ialade ban ieid ia ki kam kilan met la kadei ka Basketball, Karate, Boxing, Cricket namar lada lapmiet ha ki kam ialehkai kin lait na ka jingshah pynshoi ban ngop ha ki jingdih kiba sniew.
Pule lang ia kane: Yn pynlong ki Balang Catholic iaka Rally Paidbah halor ka jingiaumsnam ha Manipur
