Shillong, Nailur 09 : U Myntri Rangbah ka Jylla Conrad K Sangma ula pyntip ha Iingdorbar Thaw Ain ba ka Sorkar Jylla kala sdang pyntreikam ia ka New Shillong Water Supply Scheme, ia kaba la mang T.700 klur ia ka project.
“Ka New Shillong Water Supply ka dang shu sdang bad ngi kyrmen ba kan iarap ha ka jingsam um ha Shillong bad ki jaka ba marjan” ong u Conrad.
U Myntri Rangbah ula kren ruh halor ka jingthmu ban pyntrei ia ka Wahrynthem Water Project, ka ban pynmih sa 33 million liter ha ka shisngi, ha kaba ka Wah Umngot ha Dawki kan dei ka tyllong. Kane ka project kan iarap ban pynbiang ia ka jingsam umbam umdih ha ka thain.
U Nongialam ka Liang Pyrshah Mukul Sangma ula pynpaw ia ka jingsngewkhia halor ka jingiai neh jong ki tyllong um, haba buh hakhmat ia ka jingbym ithuh ithaw ka jinglong ka suin bneng bad ka jingkylla ka mariang.
Haba jubab, u Myntri Rangbah ula pynpaw ia ka jingpyrshang jong ka Sorkar ban leh eiei halor kine ki jingtynjuh lyngba ki project ba bei pisa na shabar (Externally Aided Project), kiba la pynleit jingmut halor ka rukom pyndonkam iaka spah mariang, ka jingpynim ia ki shyng-iar bad iada ia ki khlaw catchment area.
U Myntri Rangbah ula ban jur ruh halor ka jingkongsan jong ka Meghalaya Climate Council, kaba ula khlieh hi bad ba kynthup ia baroh ki tnad kiba don bynta.
“Ia kane ka council la btin lynti da ka State Water Policy bala rai ha u 2019. Ngi dei ka Jylla ba nyngkong ban don ia ka water policy” ong u Conrad haba bynrap ba ka Sorkar ka dang trei ia ki kam ki ban pynthikna ia ka jingiai neh ki tyllong um, khamtam haba khmih ia kijingtynjuh naka rukom long ka mariang.
U Myntri Rangbah ula pynpaw ruh ia ki jingeh ba mad da ki nongrep bad ka Jylla namar ka jingduna hap u slap ba kot 50% mynta u snem. Wat hapdeng kine ki jingeh, ka Sorkar kala pyntrei shaid shaid ia ki project ban tan ia ki um na ki tyllong bapher bapher bad ban pynbiang ia ka jingsam um ha ka Jylla, ula ong.
Hashuwa kane, haba jubab halor kane ka mat, u Myntri ka Tnad PHE Marcuise N Marak ula pynbna ba ia ka Greater Shillong Water Supply Scheme (GSWSS-III) bala ap khmih la slem bha, yn sa lah ban pyndep noh hapoh u bnau Lber mynta u snem.
“Ha nongbah Shillong, ka jingduna um la khmih lynti ba kan kham hiar hadien ba pyndep ia ka GSWSS (Phase-III)” ula ong.
Ula ong ba ka jingdonkam um dih baroh lang ba man ka sngi ha sor Shillong kynthup ki jaka ki bym pat kynthup ha ka Greater Water Supply Scheme (Phase I & II) ka long 5,58,30,000 litres. Ka umdih kaba donkam ha shullong ka long 4,17,80,000 Litres.
Ka jingduna ka umdih ha Shillong ka long 1,40,50,000 litres.
Haba phai sha Mawlai, u Marcuise ula ong ba 64,75,000 liter ka umdih la sam man ka sngi katba ka jingduna ka um dih ka long 27,75,000 liter (2.78 million liter man ka sngi).
“Haba iadei bad ka Mawlai, ka skhim hapoh ka JJM ba kyrteng ka Umshillong, Lummawnei, Umthlong, Mawiong & & B1-13 WSS ki dang iaid mynta bad shibun ki skhim ki dang don ha ka jingpynkhreh” ula bynrap.
