Shillong, Iaiong 04: U Myntri Rangbah ka Jylla u Conrad K. Sangma hynne ka sngi Thohdieng ula plie paidbah ia ka Disaster and Relief Monitoring System (DRMS), ka digital platform ka ban pynsuk ia ka jingpyntip ia ki jingjia ba sngewsih halor ka jinglynshop ki bor mariang, ka jingpyntreikam ia ki jingiarap, bad ka jingbei pisa hapoh ka jylla.
Ïa kane ka jingpyllait paidbah la pynlong ha ka kamra shong jingialang ki kynhun myntri sorkar (cabinet room), ha ka jingdon lang ki heh ophisar, Deputy Commissioner bad ki nongmihkhmat na ki tnad bapher bapher.
U Myntri Rangbah u Conrad K Sangma haba kren ha ka jingialang, ula pynpaw ia ka jingdonkam jong ka rukom treikam kaba sted bad kaba khuid bad ba shai ha ryngkat bad ka jingkitkhlieh na ka bynta ki shnong kiba shah ktah ha ka jingshah pynjulor.
“Ha ka por ba shem jingeh, man la ka khyllipmat ki long kiba kongsan bad ka DRMS kadei ban pyntikna ba ka jingiarap kan poi sha kito kiba longiing kiba mad iaka jingshah ktah bad kane kan dei ka sienjam ba khraw na ka bynta ka jylla” ong u Myntri Rangbah.
Kane ka rukom treikam ba thymmai ka tnad Revenue & Disaster Management Department ha ryngkat bad ka jingiatrei lang bad ka NIC Meghalaya, kan long kum ka rynsan ba kongsan ban pyniaid beit shakhmat bad ban pyndep ia ki kam kiba iadei bad ki jingiarap hapoh ka State Disaster Response Fund (SDRF) bad ka National Disaster Response Fund (NDRF).
Ki mat ba kongsan hapoh kane ka Disaster and Relief Monitoring System kan kynthup ia ka jinglah ban peit bniah ia ki jingjia ba sngewsih ha kylleng jong baroh ki District bad ki Block ka ban pynbha ia ka rukom treikam.
Shuh shuh ban don ka jingiatrei lang kaba jan hapdeng ka ophis u Block Development Officers (BDO), ki bor pyniaid District bad ka tnad Revenue & Disaster Management.
Kadei ban don ka jingtreikam kaba shai ha kaba iadei bad ka kam pisa pilain ha ka jingpyntreikam ha ka Public Financial Management System (PFMS) ban pynpoi beit ia ka pisa sha kiba dei ban ioh bynta.
Hapoh ka DRMS kan kynthup lang ia baroh ki jingshah pynjulor ha ka mariang ba kynthup naduh ka jingshlei um, ka jingtwa khyndew, ka lyngshop eriong bad kumjuh ruh na ka jingwan u jumai bad ruh ban pyntikna ia ka jingpyntreikam ba janai na ki bor pyniaid district bad kumjuh ruh na baroh ki tnad sorkar kiba don bynta lang.