Tura, May 3: Ia ka World No Tobacco Day la ju rakhe ha ka 31 tarik u Jymmang man la u snem ha kylleng satlak ka pyrthei. Mynta u snem ka matpdeng jong ka jingrakhe kaba la jied haka jylla Meghalaya kadei “My Meghalaya, Tobacco Free Meghalaya”.
Kane kadei ka jingpynsaphriang iaka jingpynsngewthuh ba u duma u ktah bha ia baroh ki dkhot met jong u briew bad kaei kaba ym da sngewtynnad than ruh kadei ba u duma u ktah iaka mariang bad kumjuh ia ki briew kiba wan na ki longing baduk.
Haba kren haka jingsdang ialap ia ka World No Tobacco Day (WNTD’23) ha Meghalaya, ka Dr. Lana L. Nongbri, State Nodal Officer, National Tobacco Control Program, Department of Health jongka sorkar jylla kala ong, “U duma ym tang ba u shim iaka jingim briew kiba thied ia u hynrei u dei ruh uba pynjot iaka mariang bad udei uba pyndonkam da 47% kiba la heh ka rta (15 snem shaneng)”.
“U duma ula shim ia ka jingim jong ki 8000 ngut ki briew ha Meghalaya. Halor katei ka nongrim la sdang iaka WNTD’23 campaign ha ka 22 tarik u Iaiong 2023 da kaba bthah ia baroh ki skul ba kin pynlong iaka Rally pyrshah duma bad Signature Campaign ne jingiasoi kyrteng” ila ong.
Haba pyntip ba kane ka campaign kadei shi bynta jongka Tobacco Free Educational Institutions (ToFEI) prokram kaba la pynlong haka jylla naduh u Lber 2021 da kaba iatreilang bad ka Sambandh Health Foundation, I Dr Lana ila ong “ Ka jingpynlong ia katei ka campaign ha u snem bala dep kala long kaba jop bad mynta u snem ngi kwah ba ym dei tang ki khynnah skul bad ki nonghikai hynrei wat ka imlang sahlang ruh kin iadonbyntalang”.
U Duma u shim iaka jingim haduh 7 million ngut ki briew ha ka pyrthei baroh kawei bad 13.5 lak ngut ha India.
Ki don 560 tylli karkhana kiba pynmih ia u sikret ha ka pyrthei haduh 6 trillion ia u sikret man la u snem bad kane ktah ruh ia ka mei mariang na ka jingpom ia ki dieng bad ka jingpynjaboh kaba bun hi kadei da ka jingbret ia ki sikret kiba la dep dih, ki bym lah ban pyut bad kiba ai bih iaka mariang mynta la bun bun snem.
U Deputy Commissioner, ka South Garo Hills, Shivansh Awasthi, ula ong “U duma udei u lynti ban jam sha u drug. Hynriew na ki 17 tylli ki SDG kila shah ktah ha u duma bad ki don ruh iaka jingmma ha kaban pynsaphriang ia ki 4 tylli ki jait jingpang. Ka WNTD campaign ka pynsngewthuh ia ki khynnah bad iaka imlang sahlang ban kan wanrah iaka jingkylla haka jinglong jingman kaban lam sha ka jingpynduna iaka jingpyndonkam ia u duma.
Haba iaroh ia ki skul, u DC ula ong, “Ha u snem bala dep iaka WNTD22 campaign ha South Garo Hills, kila don 322 tylli ki skul kiba la pynlong ia ki rally, la lum haduh 35,799 ngut ki jingsoi kyrteng bad palat 13,994 ngut ki khynnah pule kila iashimbynta. Mynta u snem ruh, ngi kyntu iaki skul ban iashimbynta haka jingpynlong iaki Rally & Signature Campaign. Ngi sngewsarong aika jylla jong ngi bad ngin ialeh katba lah ban iada iaka jingbhabriew jong ka Meghalaya naka jingshah ktah ha u duma”
