Shillong, Risaw 10: Ka Meghalaya kan long kawei na ki jylla ka ri India ka ban sdang siew tulop noh ïa ki 7000 ngut ki nongtrei ASHA hapoh ka jylla lyngba ka App ba la tip kum ka ‘ASHA Payment App’.
Ka tnat ka koit ka khiah ka sorkar jylla kala pyntip ba ka jingsiew ïa ki ASHA kiba dei ki nongtrei ba hakhmat eh ka koit ka khiah ha ki shnong ki thaw ka long katkum ka jingtreikam jong ki ha kaba ki hap ban kdew ïa ki kam ba ki trei man la u bnai.
Ka kyrwoh naka tnat ka kdew ba ha ki snem bala dep ka rukom siew ka slem bha na ka daw ka jingjrong palat ka rukom treikam bad mynta ka kynti ka sorkar jylla kan pyntreikam noh da ka ASHA Payment Application ban pynsuk bad pynstet ïa ka rukom siew sha ki ASHA.
Naka liang ka nongtrei ASHA jong ka Mawroh PHC ka kong Happy Makdoh kala iathuh ba dang shen kala dep phah ïa ki kam kiba nga trei mynta u bnai lyngba ka phone bad lyngba kane ka APP ka jingsiew ki ïoh noh tang hadien san sngi.
Ka kong Happy kala iathuh ba ha ki snem bala dep ki ASHA ki hap ban ap da ki bnai ki bnai ban ïoh ïa kitei ki jingsiew bapher bapher kaba ju poi haduh u pud ba ki hap ruh ban mih madan.
Lah ban kdew hangne ba ïa katei ka ASHA App la pyntreikam ha ka jylla baroh kawei naduh u Lber mynta u snem bad haduh mynta ki la don haduh 7067 ngut ki ASHA kiba la dep ban rejistar ha katei ka App. La pyntip ruh ba napdeng kitei ki la don haduh 6915 ngut kiba la dep ban ïoh ïa ka jingmynjur bad kumba 9.13 klur tyngka ka pisa la dep ban pyllait haduh mynta.
Naka liang u Mission Director ka National Health Mission (NHM) u Ram Kumar ula ong ba kane ka rukom treikam kaba rim ka long kaba jrong bad shimpor bha bad ka don ruh bun ki kyndon kaba poi haduh u pud ba ka jingsiew ruh ka slem bad mynshwa ka jingsiew ïa ki ASHA ka shimpor haduh 120-150 sngi hynrei da kane ka App mynta ka jingsiew kan shim por tang hapoh 5-7 sngi.
U Ram Kumar u ïathuh ba nalor ba ka rukom siew ka long kaba kloi ka pyntikna ruh ïa ka rukom siew kaba khuid namar la phah beit beit sha ki bank account jong ki ASHA bad kane kan pynsuk ïa ki ophisar ha ki distrik bad ruh ha ka jylla ba kin peitngor khnang ba ka jingsiew kan long beit ha ka por.
Ka kytrwoh naka tnat ka koit ka khiah ka kdew ba ki paidbah ne ki ASHA ki lah ban ioh jingtip kiba kham bniah lah ruh ban peit da kaba ïaid lyngba ka website jong ka www.meghealth.in na ka bynta kino kino kiba kwah ban tip shuh shuh.
Naka liang u District Community Process Coordinator jong ka NHM Tura u Piulish R Marak ula ong ba wat hapdeng ka jingthut ki kor internet ki ASHA ki la sdang ïa katei ka jingtreikam lyngba ka APP bad mynta ki la sngewthuh haduh katno ka pynmyntoi ïa ki.
