Shillong, Naitung 03: U Nongkittien syiem (Ambassador) ka Mongolia sha India, u Dambajavyn Ganbold ha ka sngi thohdieng ula plie ia ka India-Mongolia Joint Military “Nomadic Elephant” Exercise ne ka jingiakilan met lang hapdeng ki shipai Mongolia bad India, kaba dei shi bynta ban wanrah ia ka jingiadei hapdeng kine ki artylli ki ri.
U Ganbold ula ong ba ka ri India bad Mongolia kila tei ia ka jingiadei kaba iajan da kaba pynshong nongrim ia ka kolshor bad ka jingngeit katkum ka histori.
“Kane ka jingiakilan met lang ka dei shi bynta jong ka jingiadei ba iajan hapdeng ki shipai bad hapdeng kine ki ri” ula ong.
Ula ong ba ka ri Mongolia ka dang treikam haka polisi treikam ka jongka kaba la tip kum ka “Third Neighbour” bad ka ri India kadei kaba la kynthup lang ha katei ka polisi treikam bad ki ri kiba nabar. Ula ong ruh namar ka jingdon jingma ia ka thaiñ bad ia ka pyrthei baroh kawei, kumta ka ri Mongolia bad ka India kila don ia ka jingiatreilang kaba iajan bha ban don ka jingshngaiñ.
Ka Polisi treikam “Third Neighbour” jong ka ri Mongolia ka long ban jam shaphrang ha kaban don ia ka jingiadei ym tang bad ka ri China bad Russia kaba la don baroh shi katta mynta la bun phew snem bad mynta ka Mongolia ka dang pyrshang ban tei iaka jingiadei bad kiwei pat ki ri ruh nalor jongkitei ki artylli ki khlain bor.
Ula ong, ba ka ri India bad ka Mongolia kila don ia ka jingiadei naduh ki por hyndai hynthai bad ki riewpyniaid niam kiba shemphang na kitei ki artylli ki ri kila iasam mar kylliang ha kaba iadei bad ka jingngeit bad ka jingbtin lynti ha ka jingnang jingtip.
Ula iathuh, ba ia katei ka jingiadei kaba naduh ki por mysnhwa kala jah noh naduh ba ka ri Mongolia kala hap haka jingsynshar kaba 70 snem ha ki Communist ia kaba ula ong ba kadei ka “Iron Curtain” kaba ka Mongolia kala sahkut shadien.
Ka Mongolia kala hap haka jingshah synhsar ha ki Communist naduh u snem 1921 haduh u 1990, ia kaba la pyniahap ia ka rukom synshar ka jongka kum ka ri USSR (Russia), hynrei kane ka ri kala jam bad kylla noh sha ka jingsynshar paidbah bad ka iew khaïï pateng naduh u snem 1992.
U Ganbold ula ong ba ka ri India bad ka Mongolia kila pynneh pynsah ia ka jingiadei ka jongki naduh u snem 1955 bad kin sa rakhe iaka jingdap 70 snem jonag ka jingiadei hapdeng kine ki ar tylli k iri ha u snem 2025.
U Nongkittiensyiem ula ong, ba kane ka jingai jinghikai markylliang ne ka joint military exercise kan dei ka lad kaba ki shipai na baroh ar tylli ki ri kin ioh jinghikai bad kane kadei ka sien kaba 16.
Ki shipai ka Mongolia ki ieng ban ioh ia ka jinghikai bad jingshemphang na ki shipai jong ka ri India bad kane kan iarap ia ki ha kiba bun ki liang bad ha kaban pynneh iaka shongsuk shongshngaiñ haka pyrthei baroh kawei.
Kila don 45 ngut ki shipai na ka Sikkim Scouts bad kumba 150 ngut na ka Quick Reaction Force Battalion jongka Mongolian Army kiba la iashimbynta ha katei ka jingioh jinghikai pyntbit.
Kane ka jingai jinghikai kan pynleit jingmut ha kaban ai jinghikai ia ki shipai ha ki kam khynra ha ki jaka khapsor, ki jaka lum bad ki riat bad kin don ki bynta bay n ai jinghikai ruh ha kaba iadei bad ka jingiakhun pyrshah ia kikam pyntriem jongki lehnoh bad don ka jingiatreilang bad ka jingpeitngor bad kiwei kiwei.
