Shillong, Naiwieng 20 : U Symbud Myntri Rangbah ba khmih ia ka Tnad Transport Bah Sniawbhalang Dhar ha ka sngi Palei, ula pyntip ba ka Sorkar kala pynkhreh ban khot tender biang da kawei na ka bynta ka project ban shna pynheh ia ka Shillong Airport.
“Ngi la pynkhreh ban pynlait noh ia ka tender. Tang mar syn dep aiti ia ka tender, ka kam kan sa sdang noh. Ka dei ban long mynta u snem” ong u Bah Sniawbhalang haba bynrap ba ka tender ba khot kham shuwa lah hap ban pynduh noh namar ki katto katne ki jingeh.
Kat kum ki kyndon bala aiktien da ka Airport Authority of India (AAI), kiba ioh ia ka kam kin iohpor 18 bnai ban pyndep ia ka project naduh ka sngi ba aiti ia ka work order.
“Ka kyndon kaba ki pyntip sha ngi ka long ba naduh ka sngi ba aiti ia ka work order, ka por ban pyndep ia ka project ka dei 18 bnai” pynshai u Bah Sniawbha.
Kane ka project, ka dei kaba la mang T. 119.44 klur bad ka kynthup ia ka jingpynjrong ia ka runway ba 571meter (2400 m baroh lang), pynheh ia ka terminal building bad apron, bad ki jingtei kiba donkam ban lah pyniaid ia ka liengsuin A-320.
Kham hashuwa, ka Sorkar Jylla kala mynjur ban thied ia ka jaka ba 11.75 acre ha ka dor ba T. 72.17 klur.
Haba iadei bad ka Baljek Airport, u Bah Sniawbha ula ong ba ka jingiajurip lang hapdeng ka AII bad ka Sorkar Meghalaya ka dang sahteng ban ithuh bad thied shuh shuh ia ki jaka ba donkam.
“Ngi dang ap ia ka jingiajurip lang….ngi donkam ia ki riewshemphang na ka AAI ba kin wan bad pyni ia ka jaka kaba dei hashuwa ba ngin thied ia ka jaka” ula ong haba jubab ia ka jingkylli ba ka Sorkar kala kyrpad ban mang T.50 klur na ka bynta kane ka project.
U DyCM ula ban jur ba ka jingsiew kam dei satia ka jingeh hynrei, ka dei ka jingdonkam ia ki riew shemphang ka AAI ban pynthikna ia ka jaka kaba dei ban pynheh ia ka Kad.
