Nongpoh, Risaw 13: Ka jingiakop kieng lieng ha ki wah ba la tip kum ka Megha Kayak Festival 2022 kaba dei ruh ka sien kaba 5 kaba la pynlong da ka Ri Bhoi Water Sport & Tourism Cooperative Society Ltd ha ka jingiatreilang bad ka tnad Meghalaya Tourism, ka la sdang hynne ka sngi palei ha ka shnong kaba la tip kum ka Whitewater hapoh Umtham Ri Bhoi District.
Ha kane ka jingiakop kieng lieng, la wan ban ia shimbynta da ki nongkieng lieng kayak kiba pawnam ha ka pyrthei kiba la long kum ki lahduh ha ka pyrthei bad ruh kiba mihkhmat ha ki Olympic.
Ki nongiashimbynta kiba nabar ri kiba la poi sha kane ka jaka ki kynthup ia ki nongiashimbynta ha ki Olympic u Giovanni De Gennaro na Italy, ka Sofia Reinoso na Mexico, ka Vavra Hradilek na Czech Republic, ki World Champion loat ki kynthup ia u Nouria Newman na France bad u Adrian Mattern na Germany.
Nalor kine, kila don ruh bun ngut ki nongkieng lieng kayak na ka ri India bad kumba 15 ngut napoh ka jylla Meghalaya kiba la dep ban ia shimbynta ha ka jingiakop niahlieng kayak ha ka National Level Kayaking Competition ha Kerela.
Ha ka jingiakren bad ki nongpyniaid, u Ian Vincent bad ka Sheela Vincent, ki la pynpaw ba ka thong ba la pynlong ia kum kane ka jingiakop kieng lieng kayak ka dei namar ka jingthmu ban pynlong ia ka jylla Meghalaya kum kawei na ki jaka iakop kieng lieng kayak ba pawnam ymtang ha ka Ri India hynrei ha ka pyrthei hi baroh kawei.
“Kyrpang ruh ban pyniaryngkat kyrdan ha ki jingiakhun niah lieng kayak katkum ka Olympic standard da ka jingwan ban ia shimbynta da ki nongiakhun kiba la bna nam bad kiba la long ki nongjop ha ki lympung ka pyrthei bad ruh ha ka Olympic” kila ong.
Kine ki arngut kila ong “Watla ngi don shibun ki jingeh ha kaban nang kyntiew ia ka kam ialehkai sport namar ka dei kaba kham rem na ka bynta ki nongiashimbynta, hynrei da ka jingwan shakhmat ki bor ka sorkar jylla Meghalaya ban ai ka jingiatreilang khamtam ban bei pisa kum ka kynhun ngi don ka jingkyrmen ba yn lah ban pynurlong ia ka jingthmu ban pynlong ia kane ka jaka kum kawei ka jaka ai jinghikai kaba bna nam ha ka ri hi baroh kawei bad ruh kum kawei ka jaka ialehkai kieng lieng kayak ha ka pyrthei nangta kaba lah ban kyntiew ia ki khun samla ka jylla kiba angnud ban iashimbynta ha kane ka jait sport”, kila ong.
