Nongpoh, Nohprah 13: Ka jingsdang ban maramot ia ka jingkieng Dam kaba la sdang mynta ka sngi, ka la wanrah ia ka jingthnum hapdeng ki paidbah nongleit nongwan kiba la hap ban mad ia ka jingdheng kali kaba la neh katto katne por namar ka jinghap ban pynsangeh shiliang shiliang ban jam lyngba kane ka jingkieng.
Ka jingmaramot ia kane ka jingkieng ka dei kaba la leh da ka ITC Cementation India Limited kaba la ap ia ka jingbit ban ioh sdang noh ia ka jingmaramot ia ka jingkieng damsite kaba la neh kumba 4 bnai eiei na ka bynta ban maramot ban kyrshan ia ka jingkieng damsite kaba la kut noh ka por treikam bad kaba buh jingma ia ka leit ka wan jong ki paidbah.
La sakhi ruh, ba ha ka sngi sdang ban maramot ia ka jingkieng mynta ka 13 tarik u Nohprah, la sdang ia ka jingksam thliew ha baroh shilynter jong katei ka jingkieng bad ki bor ba maramot ia kane ka jingkieng ha ryngkat ki bor pulit ki la hap ban pyrrkhing ruh wat ia ka iaid ka ieng jong ki kali kiba kiew sha Shillong bad kiba hiar sha Guwahati ha kaba la wanrah ia ka jingdheng kali kaba jur ha ki bynta jong kane ka jingkieng.
Ki pulit ka Ri Bhoi District ki la hap ban pynkylla ia ka lynti iaid ki kali kiba wan na ka thain Guwahati ban leit ban nongbah Shillong bad baroh ki kali ki la hap ban iaid lyngba ka Umiam sha Umroi Airport-Umrynjah bad ban pei lyngba sha u surok VIP Road Mawlai Mawtawar, NEHU ne sha Polo katba ki kali rit kiba hiar na Shillong sha Guwahati hi ki dang ioh ban iaid lyngba katei ka jingkieng Damsite.
Haba kren bad u Construction Manager ka ITC Cementation India Limited, u Hanuman Kalamb, u la iathuh ba ka jingsdang ban maramot ia kane ka jingkieng damsite ka long hadien ka jingiohbor na ki bor ka sorkar Meghalaya kiba la ai jingbit hadien 4 bnai.
Ula ong ba ka jingmaramot ka la sdang mynta ka sngi da kaba ksam thliew ha ki bynta jong kane ka jingkieng na ka bynta ban thep pat ia ka dewbilat ha kito ki bynta kiba la don ka jingsynjor hapoh kane ka jingkieng.
U la iathuh ruh, ba ha kane ka jingtrei ban maramot ia kane ka jingkieng kan don shisha ka jingktah ia ka leit ka wan jong ki paidbah namar kan kham pyrkhing bha ia ka jingiaid ki kali khamtam ki kali heh.
Ula ong ba lada ka jingtrei ka iaid khlem kano kano ka jingpynthut, ka jingmaramot ka lah ban dep tang hapoh ki 4 bnai ban wan.
“Kane ka jingkieng dam ka dei kaba la rim bha bad kaba la kut ka por kumba la buh ban pyndonkam namar ka jingkhlain jong ka um kaba don ha kane ka dam, kumta ha kane ka jingmaramot ban pynjlang biang ia ka jingkhlain jong kane ka jingkieng kan long shisha kaba kham kongsan bha bad ki bor jong kane ka kompani ITC Cementation India Limited kin treishitom ba la kumno kumno kin lah ban pynjlang biang ia ka jingkhlain jong kane ka jingkieng kumba 25 snem eiei”, ong u Hanuman Kalam.
